Tridhjetë e tre minatorë kanë vdekur apo janë të humbur pas një shpërthimi në një minierë qymyrguri në qytetin e Donjeckut në Ukrainën lindore.
Shpërthimi ndodhi të mërkurën në minierën e Zasjadkos, pranë aeroportit të qytetit. Sipas zyrtarëve të Donjeckut, të vendosur në Mariupol që kur qyteti ra në duart e rebelëve, në turn ishin 230 punëtorë, 198 prej të cilëve ia dolën t’i shpëtojnë shpërthimit.
Pjesa e mbetur, 32 minatorë, u vranë, bashkë me një tjetër që vdiq nga plagët pasi doli prej minierës, thanë zyrtarët.
Por rebelët e së vetëdeklaruarës Republika e Popullit të Donjeckut u shprehën se 23 minatorë mbetën të vdekur, ndërsa 10 të tjerë janë të humbur.
Kryetari i parlamentit të Ukrainës, Volodimir Grojsman, e quajti shpërthimin një “tragjedi të tmerrshme”, dhe u kërkoi ligjbërësve të mbanin një minutë heshtje.
Zyrtarë të minierës thanë se shpërthimi ka shumë të ngjarë të jetë shkaktuar nga gazi, e të mos jetë i lidhur me luftimet në frontin pranë midis rebelëve pro Moskës dhe forcave qeveritare ukrainase.
Autoritetet separatiste në Donjeck bënë të ditur në një deklaratë se shpërthimi ndodhi në një thellësi më tepër se 1.000 metra. Në deklaratë thuhet se shpërthimi qe rezultat i një përzierjeje të gazit dhe ajrit, një shkak i zakonshëm i aksidenteve të tilla në miniera.
Ky është një tjetër incident tragjik në minierën e Zasjadkos, pas atij të ndodhur në vitin 2007, kur më tepër se 100 minatorë u vranë në një shpërthim metani. /tesheshi.com/
