Dhjetë komunat me shumicë serbe në Kosovë, përmes një komunikate të përbashkët kanë kërkuar nga qeveria e Kosovës dhe ajo e Serbisë, që në takimin e ardhshëm në Bruksel, të arrijnë marrëveshje për formimin e Asociacionit të Komunave Serbe.
Komunat serbe përmes kësaj deklarate, kanë kërkuar nga përfaqësuesit e të dyja qeverive, që të mbajnë takime konsultative para dialogut të paraparë që do të zhvillohet me 25 gusht.
Po ashtu, kërkesave të tyre për Asociacionin ia kanë bashkangjitur edhe kërkesën që institucionet përgjegjëse të përdorin të gjitha kapacitetet e tyre, që i akuzuari për krime ndaj shqiptarëve, Oliver Ivanoviç, të lirohet nga paraburgimi siç e kanë quajtur ata, i padrejtë, dhe t’i mundësohet mbrojtja në liri.
Kërkesa është drejtuar nga Goran Rakiç, kryetar i komunës së Mitrovicës Veriore së Kosovës, Dragan Jabllanoviç, kryetari i komunës së Lleposaviçit, Vuçina Jankoviç, kryetari i komunës së Zveçanit, Stevan Vulloviç, kryetari i komunës së Zubin Potok, Vlladeta Kosti, kryetari i komunës së Graçanicës, Branisllav Nikolliç, Kryetari i komunës së Shtërpcës, Dragan Nikolliç, kryetari i komunës së Parteshit, Sreqko Spasiç, kryetari i komunës së Kllokotit, Gradimir Mikiç, kryetari i komunës së Ranillugut, Svetisllav Ivanoviç, kryetari i komunës së Novobërdës. /tesheshi.com/
