Një prej bashkëpunëtorëve të ngushtë të presidentit të Burundit lajmëroi se ai ishte kthyer tashmë në vend, por për arsye sigurie nuk dha informacione të mëtejshme.
Pierre Nkurunziza ishte të mërkurën për bisedime në Tanzani, kur pas javësh të tëra protestash në rrugë kundër dëshirës së shfaqur prej tij për një mandat të tretë, ish-shefi i shërbimit të fshehtë, Godefroid Niyombare, lajmëroi për grushtin e shtetit.
Fraksionet rivale brenda forcave të sigurisë u panë të përplasen rreth kompleksit të radio-televizionit shtetëror, duke ngritur dyshime mbi rezultatin e grushtit të shtetit.
Transmetimet radio-televizive u ndërprenë për një kohë të shkurtër, por rinisën pasi forcat kundër puçit zmbrapsën një sulm të trupave rivale.
Kriza ka shtuar frikën për kthimin e dhunës në vendin e varfër afrikan, që është ende në rrugën e mëkëmbjes pas një lufte civile 13-vjeçare që mori fund në 2006-n dhe la pas mijëra të vdekur.
I menjëhershëm qe dhe reagimi i bashkësisë ndërkombëtare, dhe SHBA-të ripërsëritën se Nkurunziza mbetej presidenti legjitim.
Zëdhënësi i Departamentit të Shtetit, Jeff Rathke, deklaroi se, “Ka pretendime rivalizuese për pushtet, por ne njohim presidentin Nkurunziza si legjitim.”
Grushtin e shtetit e dënoi dhe Këshilli i Sigurimit i OKB-së, duke bërë thirrje për një kthim të shpejtë të rendit.
Kritikët e presidentit thonë se kërkesa e tij për t’u rizgjedhur dhunon kushtetutën dhe marrëveshjen e paqes që i dha fund luftës civile.
Në krahun tjetër, besnikët e presidentit deklaruan përpara kthimit të tij se kishin në kontroll aeroportin dhe zyrat presidenciale.
Një prej figurave kryesore të grushtit të shtetit, gjenerali Cyrille Ndayirukiye, e pranoi personalisht dështimin e lëvizjes.
