Kanë dështuar “me sukses” negociatat ndërmjet SHBA-së dhe Rusisë që u zhvilluan për herë të parë në një qytet ballkanik, Beograd.
Siç bën të ditur televizioni serb B92 që i ka ndjekur me detaje këto negociata, Kurt Wolker, i dërguari i SHBA-së për Ukrainën, tha se “takimi i Beogradit nuk ka prodhuar asgjë”.
Wolker ka biseduar për 24 orë në një hotel të Beogradit me këshilltarin e Vladimir Putinit, Vladislav Surkov, por jo vetëm që nuk kanë përparuar, por siç bën të ditur “Politico” janë bërë edhe hapa prapa.
Nga tre takime që janë zhvilluar ndërmjet SHBA-së dhe Rusisë për Ukrainën, dy në Beograd, asnjëri nuk ka prodhuar ndonjë rezultat.
Surkov tha për gazetarët që nga 29 amendamente që u paraqitën për një marrëveshje mes palëve, u ranë dakord vetëm për 3 të tilla.
Rusia propozoi vendosjen e “Kaskave Blu” në lindje të Ukrainës ku po zhvillohen luftimet, por Kiev e kundërshtoi duke theksuar se kjo do të shënonte praktikisht ndarjen e Ukrainës dhe pushtimin nga Rusia. /tesheshi.com/
