Këshilli i Sigurimit i OKB-së ka votuar për dy projektrezoluta mbi Halepin, pa mundur të miratojë asnjërën prej tyre.
Projektrezoluta e hartuar nga Franca, e cila kërkonte një ndalim të menjëhershëm të sulmeve ajrore dhe të luftimeve në Halep, si dhe një armëpushim të bashkëshoqëruar me futjen e ndihmave humanitare në tërë Sirinë, nuk ka mundur të miratohet për shkak të vetos së Rusisë.
Kjo është hera e pestë që Rusia ka vënë veton për një projektrezolutë mbi Sirinë.
Në favor të projektrezolutës kanë votuar njëmbëdhjetë prej pesëmbëdhjetë anëtarëve të këshillit.
Më pas është kaluar te projektrezoluta e Rusisë, e cila nxiste një armëpushim, por nuk e përmendte ndalimin e bombardimeve. Teksti i hartuar nga Rusia nuk ia ka dalë të marrë votat e nevojshme për t’u miratuar.
Ambasadori britanik në OKB i ka kërkuar Rusisë pas votimit të dështuar të ndalë bombardimin e Halepit.
“Ai [propozimi rus] dështoi sepse nuk ia doli të kërkonte një përfundim të menjëhershëm të bombardimit ajror të Halepit,” theksoi Matthew Rycroft.
Vitaly Churkin, ambasadori rus, i është përgjigjur duke thënë se Britania e Madhe duhet të ndalojë së mbështeturi terroristët.
Gjendja në Halep mbetet tejet e nderë. Ofensiva e forcave të regjimit sirian që prej mbarimit të armëpushimit ka sjellë një përparim të tyre, në kërkim të marrjes së zonave të kontrolluara nga kryengritësit. Qindra janë të vrarët që prej nisjes së ofensivës, përgjithësisht civilë. /tesheshi.com/
