Nga Blendi Gashi
Viti 2016-të mund të thuhet se e legjitimoi fjalën “derr” si epitet fyes, në politikën kosovare. “Derr” tashmë përbën dhe pasqyrimin më real të degradimit të gjuhës në ligjërimin politik, ngjashëm si dhe në Shqipëri. E nisi Isa Mustafa që në 2015-ën, kur e quajti të tillë Albin Kurtin, për të vijuar një vit më vonë me Visar Ymerin që ia ktheu Mustafës me të njëjtën monedhë, ndërsa avancoi me Veselin duke e quajtur “kryederr”.
Dhe lista vazhdon…
Më datë 27 të këtij muaji u fye rëndë edhe ministrja e Drejtësisë, Dhurata Hoxha e cila u quajt “lopë”, nga anëtari i kryesisë së VV-së, Sami Kurteshi, njëherit ish-avokat i Popullit.
“Sonte (27 dhjetor) në Rubikon është duke folur lopa ‘transparente’ quajtur ministre në Kosovë, e cila është pjesë e klikës vrastare të kësaj qeverie fashiste vrastare!”, shkruajti Kurteshi në llogarinë e tij në Facebook.
Ndaj gjuhës së përdorur nga Kurteshi reaguan edhe dy deputetet e PDK-së, Xhevahire Izmaku dhe Blerta Deliu-Kodra, por pa zoologjizuar gjuhën.
“Ata që ty të shajnë e vuajnë mungesën e profilit tënd! Në vend të reagimit, një postim për ty; Kosovës i duhen sa më shumë Dhurata e asnjë lloj i sojit të Sami Kurteshit! Krenare me punën dhe virtytet tua jemi ne!”, reagoi Izmaku në Facebook.
“E papranueshme jo vetëm për një grua por për çdo qenie njerëzore, dhe e patolerueshme kur kjo gjuhë përdoret nga një ish-Avokat i Popullit. Kurteshi si një avokues i të drejtave të njeriut, ka shkelë rëndë mbi këto vlera dhe parime të garantuara me Kushtetutën e Kosovës. Lëvizja Vetëvendosje duhet të distancohet publikisht nga deklarimet e zotit Kurteshi. Mosdistancimi nga një gjuhë e tillë denigruese është porosi e dëmshme për vet diskursin e opinionit publik. Prandaj institucionet dhe shoqëria duhet ta dënojnë ashpër dhe të marrin masa konkrete karshi këtij fenomeni”, reagoi dhe Deliu-Kodra po në Facebook.
Por “lopa” u rikthye sërish. Nazlie Bala, anëtare e VV-së, e cila e ka udhëhequr Sekretariatin e Gruas në këtë lëvizje, në profilin e saj në Facebook e postoi deklaratën e deputetes Deliu duke ia vënë një mbishkrim.
“Shumë e lopa kullotë badihava”, shkruajti Bala.
Më pas, fjalën e morri një burrë, zëdhënësi i AAK-së, Muharrem Nitaj, edhe ai larg çdo derri a lope .“Nuk është burrni të ofendosh një grua, edhe kur politika e saj mund të bie ndesh me ty, ani se komunikimi me emra shtazësh, është shndërruar në diskurs politik. Na është bërë politika kopsht zoologjik”, thuhet në reagimin e Nitajt.
Jeta Bakija sakaq, nga koalicioni i organizatave joqeveritare “Të drejtat e barabarta për të gjithë”, kërkoi që Sami Kurteshi të kërkojë falje.
“Fatkeqësisht nuk është deklarata e parë nga një person publik, dhe nuk është hera e parë që reagojmë si koalicion. Dëshriojmë që të ngrisim vetëdëdijen se nuk është mirë të përdoret fjalor i tillë. Gruaja duhet të respektohet dhe nuk duhet të thirret ndryshe përveç ‘Grua’ ose ‘Zonjë’. Ende nuk kemi marrë asnjë përgjigje. Ai nuk ka nevoj të na drejtohet neve direkt, por nuk kemi parë ende një reagim të tij. Shpresojmë se do të kërkojë falje karrshi zonjës dhe gjitha grave në Kosovë për fjalorin joadekuat”, deklaroi Bakija për mediat kosovare.
Dhe Kurteshi bën një tërheqje nga cilësori “lopë”, për të kaluar në një tjetër ndoshta akoma më të rëndë.
“Kjo ministre e këtij pushteti kriminal dhe vrastar, është një hienë e cila kultivon kurvëri politike të përzier me arrogancë dhe injorancë të neveritshme. Ajo jo vetëm që nuk meriton një kërkimfalje, por meriton çdo përbuzje politike e shoqërore që mund të bëhet. Nëse ajo me zell luan rolin e mashës së shefave të saj, për mbulimin e vrasjes së Astritit, atëherë duhet edhe të përballet me pasojat e rolit që luan. Unë e di se shumë miq të sinqertë e kanë ndier veten keq për shkak të fyerjes me fjalën lopë. Kjo nuk është fyerje për të dhe sojin e sorollopin e saj vrastar, po është tepër e butë për të, për veprimet e saj politike. Prandaj po e tërheq fjalën “lope” dhe po i them hienë, ashtu si janë edhe padronët e saj politikë”.
Reagojnë sociologët
Sociologët kanë tërhequr vërejtjen se një fjalor i tillë po i shkakton një dëm të jashtëzakonshëm, sidomos tek të rinjtë që aspirojnë politikën
Besim Gollopeni i tha tesheshi.com: “Pra, rrezikohet që në të ardhmen të instalohet një kulturë e tillë komunikimi në institucionet e vendit ku, fuqia e fjalës së thënë nuk mbështetet ne rregullat e vendosura institucionale por, mbështetet në fuqinë e fjalorit sa më të vrazhdë që përdor kundrejt tjetrit”. /tesheshi.com/
