Kryeqyteti shqiptar, Tirana është ngjyrosur me ngjyrë të kuqe pas fitores së Partizanit ndaj rivalit historik Tirana, (1-0). Ka mjaftuar një gol i Xhevahir Sukajt në minutën e 51-të, për t`u vendosur kryendeshja e javës së gjashtë të kampionatit të 77-të shqiptar. Tashmë “demat” marrin kryesimin e kampionatit dhe u japin një sinjal kampionëve në fuqi, Skënderbeut, se ky sezon do jetë shumë e nxehtë.
Stadiumi kombëtar “Qemal Stafa” ishte i mbushur nga tifozët e shumtë që kishin ardhur për ta ndjekur nga afër derbin më të madh shqiptar, ndërmjet Partizanit dhe Tiranës. Atmosfera e krijuar në shkallët e stadiumit ishte përtej limiteve, ndërkohë lojtarët e dy skuadrave nuk përmbushën pritshmëritë e tyre, e sidomos ata bardheblu që zhgënjyen edhe njëherë tifozët e tyre në derbi.
Por, sidoqoftë ka mjaftuar një gol i Xhevahir Sukajt në pjesën e dytë të lojës, që Partizani ta fitojë ndeshjen. Një goditje, një gol dhe tre pikë për “heronjtë” e Starovës, që tani pas gjashtë javësh e sheh skuadrën e tij në kreun e kampionatit shqiptar.
Ndërkohë, Tirana zhgënjen sërish. Një humbje tjetër në derbi, për më tepër mbetet prapa skuadrave në kreun e tabelës, për të cilën do zhvillohet “luftë” e madhe deri në fundin e kampionatit. /tesheshi.com/
