Deputeti i opozitës Dashamir Shehi, kërkon rikthimin në jetën normale parlamentare. Për të përditshmen Mapo, ai është shprehur:
“Unë gjykoj që protesta në njëfarë mënyre ia ka mbërritur qëllimit. Protesta e parë e zhvilluar në Bulevardin “Dëshmorët e Kombit” tregoi se populli i përgjigjet një teze të tillë, që është e lidhur me dekriminalizimin. Por duke u shtyrë vazhdimisht dhe më tej, unë them që do të fillojë të provojë efekte te tjera, të cilat nuk janë të gjitha pozitive sepse një protestë nuk mund të vazhdojë në përjetësi deri sa të mbarojë procesi. Unë gjykoj që PD-ja duhet ta mbyllë këtë punë dhe kjo ishte faza e parë.
Tanimë protestat duhen alternuar me ide të tjera, me forma të tjera të protestimit, me prezencë ndryshe në media dhe në Kuvend deri sa institucionet të marrin vendimet që duhen. Prokuroria të mbyllë hetimet, gjykata të marrë vendimet e saj, sepse njëkohësisht ne si opozitë duhet të respektojmë edhe këto institucione që i konsiderojmë të pavarura, sepse ndryshe ky dyshim permanent që institucionet tona nuk e bëjnë punën, gjykoj që i shërben pastaj varësisë së këtyre institucioneve nga politika dhe qeveria.
Nëse Kuvendi do të vazhdojë të bëjë policin, prokurorin, hetuesin dhe gjykatësin, sigurisht që shumë pak kurajë do të vijë nga institucionet e pavarura, prandaj dhe protestat ishin diçka e mirë, por deri këtu.
Përtej kësaj, unë them se fillojnë dhe prodhojnë efekte negative. Njëkohësisht dobësojnë institucionet dhe denatyrizojnë funksionin që kemi si parti politike dhe si grup parlamentar, sepse në fund të fundit ne nuk jemi as hetues dhe as prokurorë. Gjithashtu do ta humbim seriozitetin edhe përpara arbitrave ndërkombëtarë. Prandaj, unë do të sugjeroja që duke filluar nga e hëna që vjen, të hapim një sezon të ri të formës së protestimit… Se ky “tam tami” i përditshëm, sigurisht që duke u bërë monoton humb edhe energjitë e veta”.
Kujtojmë se dhe në raste të tjera aksionesh opozitare, sidomos në raste bojkotesh, deputeti Shehi nuk ka shprehur dakortësi me grupimin politik ku bën pjesë. /tesheshi.com/
