Ka reaguar selia e PS-së ndaj deklarimeve të kreut demokrat, Basha, për 8 dhjetorin si ditën kur do nisë një udhë që nuk do të ndalet, ajo për rrëzimin përfundimtar të dyshes Rama-Meta.
“Lulzim Basha mendon se duke trashur zërin do të fitojë pak më shumë mbështetje brenda radhëve të PD. Kjo është e vetmja arsye që pas humbjes së thellë në zgjedhje e 2013-ës dhe pas humbjes edhe më të thellë në zgjedhjet e 2015-ës, Basha kërkon revolucion. Kjo mazhorancë ka shumë për të bërë, vërtetë rritja ekonomike është dy herë më e lartë se kur qeveriste Partia Demokratike, por duhet edhe më shumë që shqiptarët të jetojnë edhe më mirë. Po luftojmë informalitetin, po vendosim rregull, po bëjmë shtet e po punojmë për reformën në drejtësi që për Shqipërinë të hapet një faqe e re”, tha gjatë një daljeje për shtyp deputeti socialist, Alfred Peza. /tesheshi.com/
