Nënkryetari i AAK-së, Ahmet Isufi, thotë se pushteti aktual e ka kthyer Parlamentin në stacion policie, duke tentuar që me dhunë të marrin vendime të paligjshme për Kosovën.
Ish-deputeti i Aleancës në një intervistë dhënë për portalin tesheshi.com, flet edhe për protestën e paralajmëruar që do të mbahet më 28 Nëntor, derisa ka një mesazh për kryeministrin Mustafa dhe zëvendësin e tij Thaçi…
Nga Blendi Gashi
Si i shihni zhvillimet që ndodhën sot në Kuvend?
Ky pushtet po dëshiron që përmes dhunës po tenton të realizoi qëllimet e veta anti-Kosovë, duke u bllokuar në marrëveshjet që janë në kundërshtim me interesin e qytetarëve të Kosovës. Parlamentin e kanë bërë si stacion policie, duke tentuar që me dhunë të aprovojnë vendime të paligjshme për Kosovë.
A ishte e nevojshme futja e sigurimit në Parlament, nxiti kjo eskalimin e situatës?
Prania e sigurimit në Kuvend tregon pushtetin diktatorial i cili është ngërthyer nga udhëheqës oligark si Isa Mustafa e Hashim Thaçi të cilët po duan me çdo kusht të imponojnë atë që është e kundërligjshme, e bazuar në përfitime të Serbisë dhe të atyre që në fakt e dëmtojnë interesin e Kosovës.
Mazhoranca megjithatë arriti të mbaj seancën në një sallë të improvizuar ku edhe miratoi buxhetin. Si e vlerësoni këtë seancë?
Pushteti mund t’i mbaj mbledhje në çajtore, ‘Zanzi Bar’, mund të shkojnë edhe në piknik, por institucioni i vetëm që është legjitim për mbajtjen e seancave, është salla e Kuvendit, ku duhet të merren vendime. Sidomos kur vendimet merren pa opozitën ato janë të paligjshme dhe do të prapësohen.
Në rast se seancat vazhdojnë të mbahen në sallë të improvizuar, si do të veproni si opozitë?
Ne (opozita) kemi deklaruar se nuk do të lejojmë të mbahen seanca normale pa i tërhequr marrëveshjet që coptojnë Kosovën, falin territor dhe poashtu e fusin ndikimin e Serbisë brenda Kosovës. Nuk do të lejojmë në asnjë mënyrë të ketë normalitet brenda Parlamentit derisa të mos tërhiqen këto marrëveshje.
Mazhoranca po fajëson opozitën se nuk po lejon debatin në Kuvend. Si të arrihet deri te një. A duhet të mos thirrën seanca të reja deri në arritjen e një kompromisi?
Derisa, ky pushtet i kriminalizuar, korruptuar dhe i dëmshëm për Kosovën mundohet t’i imponojë popullit ndarje të Kosovës, dhe veprimet që shkojnë në dëm të qytetarëve, ne nuk do t’i ndalim veprimet tona për pengimin e këtyre marrëveshjeve. Prandaj ky pushtet duhet ta kuptoi që nuk ka normalitet derisa ata sillen në mënyrë jo normale për Kosovën.
A ka mbajtur Kryesia e partisë suaj ndonjë takim pas ngjarjeve që ndodhën sot?
Sapo jemi takuar me deputetë e AAK-së të Parlamentit të Kosovës, do të konsultohemi dhe do t’i shohim veprimet e mëtutjeshme. Por, një duhet ta ketë të qartë kjo Qeveri, ‘Zajednica’ dhe Demarkacioni nuk kalojnë, sepse janë në kundërshtim me vullnetin e qytetarëve të Kosovës. Kjo, Qeveri sot ka treguar se në ditën kur vije Mbreti i Jordanisë mundohet ta shfrytëzoi një mikëpritje të tillë me gaz lotsjellës, me dhunë dhe me sistem policor. Kjo është mënyra më e mirë e tregimit të ftyrës së diktaturës.
Eskalim të situatës nuk kishte veç në Kuvend por edhe jashtë tij. Përkrahës të opozitës protestuan duke u përleshur me policinë. Do të protestoni më 28 Nëntor ashtu siç keni paralajmëruar?
Opozita e ka paralajmëruar manifestimin popullorë me 28 Nëntor dhe do të jetë një manifestim masovik, ku do të bëjmë me dije se Kosova nuk mund të keqpërdoret nga një pushtet që i ka rrënjët në krim të organizuar dhe korrupsion.
Në rast se eskalon situata në protestën që do mbani më 28 Nëntor, mbi kë do të bie përgjegjësia?
Përgjegjësia është e pushtetit sepse po e keqpërdorë dhe po e bën instrument të aparatit të dhunës policinë. Policia e Kosovës nuk duhet t’i përgjigjet urdhërave që biejnë në kundërshtim me vullnetin të tyre dhe qytetarëve, sepse kjo polici është e popullit dhe jo e një grusht njerëzve të korruptuar.
Mesazhi juaj në fund për kryeministrin Mustafa dhe zëvendësin e tij Thaçi?
Mesazhi është se nëse duam normalitet të institucioneve, të tërhiqen marrëveshjet që dëmtojnë Kosovën në të kundërtën pushteti do të detyrohet të jap dorëheqje.
/tesheshi.com/
