Deputetët e Kuvendit të Kosovës, Frashër Krasniqi i Lëvizjes Vetëvendosje dhe Milaim Zeka i Nismës për Kosovën, janë përleshur fizikisht në një studio televizive. Ka qenë deputeti Krasniqi ai që ka sulmuar deputetin Zeka.
Pas një debati me plot fyerje të ndërsjella, deputeti Krasniqi fillimisht ka hedhur ujë në drejtim të deputetit Zeka, i cili është ngritur në këmbë dhe ka gjuajtur me letra në drejtim të Krasniqit.
Pas kësaj Krasniqi ka gjuajtur me shishe uji, duke iu vërsulur deputetit Zeka dhe duke e grushtuar.
Për të ndarë deputetët, kanë ndërhyrë pjesëtarë të stafit të Klan tv, ku ka ndodhur rrahja.
Ndaj këtij rasti ka reaguar NISMA për Kosovën, duke thënë se në këtë mënyrë nuk fitohen debatet e tilla dhe se duhet forca e argumenteve politike.
“Debatet politike nuk fitohen me sulme të tilla fizike dhe e me grushte, por me forcën e argumenteve politike. Deputetet e Kuvendit janë të zgjedhur për të shprehur hapur mendimet dhe qëndrimet e tyre dhe poashtu për të debatuar për çështje tjera të ndryshme. Mospajtimet janë pjesë e demokracisë, mirëpo në asnjë mënyrë ato nuk duhet të kalojnë në sulme fizike”, thuhet në reagimin e NISMA-s.
NISMA për Kosovën i bënë thirrje Vetëvendosje-s të distancohet nga ky akt i dhunshëm, dhe të vazhdojmë ta ruajmë kulturën e komunikimit edhe në momentet kur nuk pajtohemi. /tesheshi.com/
