Deputetët socialistë do të lidhin marrëveshjen e mirëkuptimit mes tyre dhe ministrave. Kjo u bë e ditur nga kryeministri Edi Rama në mbledhjen e grupit parlamentar socialist, sipas të cilit kjo marrëveshje do të synojë përmbushjen e detyrimeve të mëdha që PS ka marrë përballë qytetarëve shqiptarë në periudhën 2017-2021.
Sipas tij, kjo marrëveshje do të mundësojë jetësimin e objektivave të përbashkëta, por edhe trajtimin e të gjitha shqetësimeve që do të vijnë nga komunitetet.
“Garanton jetësimin e bashkëqeverisjes me njerëzit e zakonshëm, por vendos edhe në një stad të ri komunikimin tonë, jo vetëm mes grupit parlamentar dhe ministrave, por edhe me qytetarët e zakonshëm. Është një libër rregullash i bashkëjetesës sonë politike”, tha Rama.
Kryeministri kërkoi që të gjithë ne ti qëndrojmë besnikë asaj që lexuam nga rezultati i zgjedhjeve të 25 qershorit, për të qeverisur shumë më mirë se mandate i parë dhe për të realizuar akoma më mirë dhe më shumë, pasi qytetarët nuk na votuan për atë çfarë ne kemi bërë, por për atë që do të bëjmë.
Ndërkohë, kreu i grupit parlamentar socialist, Taulant Balla, sqaroi se marrëveshja e mirëkuptimit ka angazhime të ndërsjellëta që synojnë demokratizimin e mëtejshëm, zgjerimin e bazës së komunikimit, vendosja para drejtësisë të çdo zyrtari që abuzon me detyrën dhe nuk i përgjigjet qytetarëve për të drejtat e tyre, si dhe për të ndërprerë nepotizmin në administratën publike dhe emërimet në çdo nivel të qeverisjes.
Sipas Ballës, kjo marrëveshje do të garantojë një tjetër qasje të qeverisë dhe deputetëve me qytetarët, përfshirë këtu edhe dëgjesat publike. /tesheshi.com/
