Komisioni për matjen e territorit i themeluar nga kryeministri Mustafa ashtu edhe siç pritej ka dhënë version e pushtetit, se Kosova nuk humb territor me marrëveshjen për demarkimin e kufirit me Malin e Zi.
Zëdhënësi i komisionit Tomor Qela, i cili ka prezantuar gjetjet e ekspertëve ka thënë se ato tregojnë se Çakorri gjendet jashtë territorit të Kosovës, duke shtuar se këto të dhëna komisioni i ka marrë në publikime të ndryshme.
“Raporti është i përbërë nga të dhëna fotografike. Gjatë gjithë kohës është ngritur një hipotezë e madhe rreth çështjes së territorit të Kosovës. Baza juridike, hartografike, dhe komunikimi ka qenë themeli i procesit të matjes së territorit të Kosovës. Akademia e shkencave dhe arteve të Kosovës në ambientet e qeverisë së Kosovës kanë deponuar dokumente hartografike të cilat përfshijnë matjen e territorit të Kosovës që nga viti 1976 deri më 2016″, ka thënë ai.
Qela ka shtuar se në bazë të gjetjeve del se kufiri i Kosovës është i pandryshueshëm që nga viti 1973 deri më sot.
Ndryshe, gjeografi Fitim Humolli që ishte pjesë e këtij komisioni dje u dorëhoq duke e quajtur jo profesional dhe politik komisionin që kryesohet nga kryeakademiku Hivzi Islami.
