Rama në Serbi e Meta në Greqi, ishin pika diskutimi në një seancë me zyrtarë të Ministrisë së Jashtme për situatën në rajon, zhvilluar në komisionin parlamentar të politikës së jashtme. Arta Dade, kryetarja e këtij komisioni, është vënë në mbrojtje të Ramës duke i quajtur deklarimet e ministrit të Jashtëm kosovar, Enver Hoxhaj si të nxituara. Kjo pas kritikave të demokratit Bumçi karshi qëndrimeve të kryeministrit lidhur me Kosovën.
“Përtej praktikës, deri në momentin kur Kosova ka përfaqësimin e vet ndërkombëtar, Shqipëria është munduar të mos luajë një rol paternalist dhe kemi qënë të kujdesshëm për këtë. Deklarata që ka bërë ministri i Jashtëm i Kosovës është e nxituar dhe nuk është në frymën e bashkëpunimit dypalësh, që synon të promovojë rolin e pazëvendësueshëm që ka luajtur Shqipëria në gjithë ecurinë e proceseve atje, si gjatë luftës, gjatë pritjes së popullatës dhe më tej në projektet e përbashkëta për shpalljen e pavarësisë dhe njohjen e saj”, tha znj. Dade.
Por gjithashtu, kjo e fundit vlerësoi dhe vizitën e Metës në Greqi, sërish në përgjigje të kritikave të Bumçit, i cili i quajti “të ngrira: raportet me fqinjin jugor.
“E konsideroj një vizitë të shkëlqyer, me gjithë elementët që ka një vizitë e një niveli kaq të lartë. Pamë predispozicionin dhe angazhimin pozitiv të palës greke për të zgjidhur çështjet e mbartura. Ne na intereson që specialistët dhe grupet e punës të ngritura në ministri të vijojnë përpjekjet që edhe çështjet e mbartura të zgjidhen, por të mos na mbajnë peng per të ardhmen e përbashkët që kemi. Kjo se Greqia, bashkë me Italinë, është një mbështetëse kryesore e Shqipërisë në proceset integruese, por edhe për faktin që kemi mbi 700 mijë emigrantë atje, që rezultojnë të mirëintegruar”, theksoi znj. Dade. /tesheshi.com/
