Raporti i sekretarit amerikan të Mbrojtjes, James Mattis për senatin ku kërkohet formimi i ushtrisë së Kosovës, ka vënë në alarm mediat serbe, të cilat e kanë pasqyruar me tituj të mëdhenj. Kështu artikulli i “Blic”, gazetës shumë të lexuar të Beogradit, shpall me të madhe: “Qeni i tërbuar i Trumpit porosit formimin e Forcave të Armatosura të Kosovës”.
“Ministri amerikan i Mbrojtjes, James Mattis, porosit që para zvogëlimit të pranisë së forcave amerikane në Kosovë, forcat vendore të Kosovës duhet të marrin mandatin për mbrojtjen e vendit”, shkruan “Blic”.
Gazeta “Danas” citon mediat kosovare kur thotë se qëndrimi i administratës amerikane karshi Kosovës mbetet i pandryshueshëm. Ndërsa, portali “Telegraf.rs” vjen me titullin “Trump shumë i ashpër në qëndrime: Kosova duhet ta formojë ushtrinë”, duke vazhduar më tej se krahas kësaj pritet që Serbia ta njohë Kosovën.
Edhe agjencia e pavarur e lajmeve “B92”, përcjell si lajm kryesor deklaratën e sekretarit të Mbrojtjes për formimin e ushtrisë së Kosovës.
Gjenerali James Mattis duket se ka vënë në alarm Beogradin, edhe pse ky i fundit ka shpresuar për marrëdhënie të ndryshme me administratën e re amerikane nga ato që kishte me administratën e mëparshme. Në një raport drejtuar Senatit, Mattis thekson se FSK duhet të shndërrohet në ushtri. Ai e ka mbështetur dialogun Prishtinë- Beograd duke shtuar se njohja e sovranitetit të Kosovës nga Serbia do të adresohet para anëtarësimit të saj në Bashkimin Evropian. /tesheshi.com/
