Senatori i Vermontit, Bernie Sanders pranon se Donald Trump, presidenti i zgjedhur i Shteteve të Bashkuara arriti të ngrihet në këtë detyrë duke prerë në zemërimin kundër establishmentit nga ana e një “klase të mesme në rënie”, por shton se ai do të vijojë ta sfidojë atë. Ndërsa me mijëra njerëz u tubuan nëpër rrugë në qytetet e mëdha për të protestuar kundër fitores së Trump, Sanders, që sfidoi pritshmëritë duke zhvilluar një garë të ngushtë me Hillary Clinton në primaret demokrate, tha se ai është i përgatitur të punojë me presidentin e zgjedhur për të ndihmuar familjet punonjëse.
Por, “demokrati-socialist” me profil të dizenjuar vetë, tha se do të kundërshtojë me forcë ato që i quajti politika seksiste, ksenofobe dhe anti-mjedisore, që vulosën fushatën e Trump për presidencën.
Senatori nga Vermonti, gjatë fushatës, e mbështeti kandidaten zyrtare Clinton, por me hezitim duke mos e lënë shpejt pas krahëve rivalitetin e ashpër në fushatën brenda për brenda partisë gjatë së cilës të dy në mënyrë të përsëritur u përplasën fort ndërsa Sanders e portretizoi Clinton si pjesë e një elite të diskredituar.
Shumë komentatorë ia atribuan popullaritetin e Sanders, sidomos midis votuesve të rinj, zemërimit kundër establishmentit, pas rënies financiare të vitit 2008.
Në një deklaratë pas zgjedhjeve, Sanders vë në dukje se Trump gjithashtu shfrytëzoi këtë zemërim. Deklarata thekson: “Donald Trump preku zemërimin e një klase të mese në degradim, që është e lodhur, madje i është mbaruar durimi me ekonominë e establishmentit, me politikën e establishmentit dhe me median e establishmentit”.
Sanders shton: “Njerëzit jaë të lodhur nga orët e gjata të punës për rroga më të ulëta, duke parë sesi vende pune me pagesë të mirë shkojnë në Kinë dhe në vende të tjera ku rrogat janë të ulëta, me miliarderë që nuk paguajnë taksat federale mbi të ardhurat ndërsa vetë nuk janë në gjendje të paguajnë tarifat e koelgjit për fëmijët e tyre – të gjitha këto ndërsa të pasurit bëhen më të pasur”.
Deklarata përfundon: “Unë dhe progresivë të tjerë jemi të përgatitur të punojmë me të në shkallën që Trump do të tregojë seriozitet për të ndjekur politika që përmirësojnë jetën e familjeve që punojnë në këtë vend”.
Por, ndërsa votuesit amerikanë dhe liderët ndërkombëtar po nisin të ndërgjegjësohen për një Shtëpi të Bardhë republikane që do të drejtohet nga një ish-yll i shfaqjeve televizive, kanë nisur protestat.
Reagimi i Sanders ndaj fitores së Trump i bën jehonë shumë votuesve në të majtë që janë alarmuar nga deklaratat ekstremiste të Trump, por që ndajnë me të zemërimin e dukshëm të mbështetësve të tij kundër elitës.
Në Britani, lideri laburist, Jeremy Corbyn, tha: “Zgjedhja e Trump është një refuzim i pagabueshëm i mjedisit tradicional politik dhe një sistemi ekonomik që thjesht nuk funksionon për shumicën e njerëzve. Është një nga shkaqet që ka sjellë pabarazi të përshkallëzuar dhe stanjacion apo rënie të standardeve të jetesës për shumicën, si në Amerikë ashtu edhe në Britani”.
Përgatiti: Juli Prifti – /tesheshi.com/
