Rreshje dëbore kanë mbuluar sërish territore të caktuara të vendit, ku vështirësitë më të mëdha janë shfaqur atje ku dhe ka më shumë lëvizje, ku veçon rruga drejt Dardhës, një destinacion turistik fundjave, me më shumë tërheqje sidomos në kohë borë. Disa automjete janë bllokuar në vendin e quajtur Bigellë.
Njoftimi zyrtar thotë se “në Qarkun e Korçës gjatë natës ka pasur reshje dëbore, të cilat vazhdojnë ende me alternime. Trashësia e borës varion nga 5 cm deri në 15 cm. Në qytetin e Korçës trashësia e borës arrin deri në 5 cm. Kontraktorët janë në akset rrugore duke punuar për mirëmbajtjen e dimërore me borëpastruese dhe grupe pune.
Në rrugën e Dardhës nga 8 km-14 km, rekomandohet kalimi i mjeteve me zinxhirë ose më goma dimërore. Vështirësi në qarkullim paraqet edhe segmenti rrugor i Bigellës në rrugën e Doganës Goricë.
Nuk ka probleme në rrugët e tjera nacionale dhe rurale të qarkut. Kërkohet kujdes nga drejtuesit e mjeteve në kushtet e lagështirës së madhe në rrugë.
Gjithashtu, Ministria e Infrastrukturës dhe Energjisë si dhe Autoriteti Rrugor Shqiptar bën të ditur se reshje bore me intensitet të ulët kanë përfshirë dhe akset Pukë-Fushë Arrëz-Kukës.
ARRSH thekson se gjatë orëve të natës, por edhe në orët e para të mëngjesit kontraktorët janë në terren për pastrimin dhe kriposjen e rrugës, duke garantuar qarkullimin normal të mjeteve.
Aktualisht nuk ka probleme me qarkullimin në të gjitha akset. /tesheshi.com/
