Hillary Clinton dhe Donald Trump janë përballur në debatin e fundit përpara zgjedhjeve presidenciale amerikane të 8 nëntorit. Atmosfera e akullt ka qenë bashkëshoqëruese e këtij debati, pasi dy kandidatët nuk i kanë shtrënguar duart as para e as në mbarim të tij, ashtu siç ka munguar dhe përshëndetja midis familjeve të tyre.
Tensionin e lartë në debat e pasqyroi fjalori i dy kandidatëve. Clinton e përshkroi kundërshtarin si një “kukull të Putin-it”. Sipas saj, Putin-i dëshironte që të zgjidhej Trump sepse donte një kukull si president të SHBA-së. “Grua e neveritshme”, kjo do të qe fraza e përdorur nga Trump për rivalen demokrate.
Kandidati republikan refuzoi, mes të tjerash, të deklarojë se do ta pranojë rezultatin e zgjedhjeve presidenciale.
“Do ta shoh kur të vijë koha,” iu përgjigj ai pyetjes nëse do ta pranonte humbjen.
“Do t’u mbaj pezull,” ka shtuar Trump, që rishtas ka deklaruar se zgjedhjet po manipuloheshin kundër tij.
“Qëndrimi kërcënon të hedhë dyshime mbi një prej parimeve fundamentale të politikës amerikane: kalimit paqësor, të pakundërshtuar, të pushtetit nga një president te një pasardhës i njohur si legjitim pas fitimit të zgjedhjeve,” citon CNN-i duke iu referuar fjalëve të Trump-it.
Temat mbi Gjykatën e Lartë, mbi politikën e jashtme, mbi emigracionin e ekonominë zunë vend në debatin e Las Vegasit.
Kur debati u kthye te qëndrimi i Trump-it ndaj femrave, për sjelljen e papërshtatshme ndaj së cilave është akuzuar pandërprerë gjatë javëve të fundit, Clinton tha: “Donald mendon se nënvlerësimi i femrave e bën atë më të madh.”
“Askush nuk ka më shumë se unë respekt për femrat,” qe përgjigjja e kandidatit republikan.
Kur drejtuesi i debatit solli në vëmendje çështjen e postës elektronike të Hillary Clinton-it dhe një pjesë të përmbajtjes së saj të bërë të njohur nga WikiLeaks, ish-sekretarja amerikane e Shtetit reagoi kësisoj: “E rëndësishme vërtet mbi WikiLeaks-in është se qeveria ruse gjendet e përfshirë në spiunazh kundër amerikanëve … kjo ka ardhur nga nivelet më të larta … nga vetë Putin-in … për të ndikuar në këto zgjedhje.”
Trump e akuzoi Clinton-in se dëshironte një politikë të “kufijve të hapur”, diçka e kundërshtuar fort prej saj.
“Sipërmarrje kriminale” e quajti Trump aktivitetin e familjes së Hillary-t, Fondacionin Clinton, ndërsa e akuzoi kundërshtaren për pranim të parave nga dhuruesit në shkëmbim të favoreve politike.
Për Trump-in, ky debat ishte një prej mundësive të fundit për t’i dhënë një drejtim tjetër fushatës, që deri tani nuk ka qenë në ndihmë të tij.
Anketimet në mesataren e tyre e nxjerrin Clinton-in në krye, me 48.6 për qind, përkundër 42.1 përqindëve të Trump-it. /tesheshi.com/
