Ish-lojtari i Valencias, Barcelonës dhe Atletikos së Madridit, mund të rigrumbullohet me përfaqësuesen spanjolle.
Lajmin e ka bërë të ditur trajneri i përfaqësueses së Spanjës, Julen Lopetegui, që ka shfrytëzuar një vizitë në SHBA për ta ndjekur nga afër David Villa-n, që tani luan për New York City-n.
“E vërteta është se e pashë atë të luante mirë dhe me shumë intensitet. Villa vazhdon të luajë në një nivel shumë të mirë, dhe në të ardhmen do ta shohim në mund të kthehet. Nuk i mbyllim derën asnjë lojtari, dhe gjithmonë i kemi në konsideratë lojtarët që mund ta ndihmojnë ekipin kombëtar. Ai është një lojtar që ka bërë gjëra të paçmueshme për futbollin spanjoll,” është shprehur Lopetegui.
David Villa ka shënuar 23 gola në 33 takime në këtë sezon në MLS, në kmapionatin amerikan të futbollit, duke qenë i dyti në listën e golashënuesve.
Në 97 aktivizime me kombëtaren spanjolle, ai ka shënuar 59 gola, si golashënuesi më i mirë i përfaqësueses së Spanjës.
Tanimë 34 vjeç, David Villa është parë për herë të fundit të luajë për ngjyrat e vendit të tij në Kupën e Botës të dy viteve më parë, në takimin ndaj Australisë. /tesheshi.com/
