Kryeministri i Kosovës Ramush Haradinaj ka thënë se ai po flet për vazhdimin e dialogut me Beogradin dhe jo e idenë e korrigjimit të kufirit me Serbinë, pasi as ai e as Hashim Thaçi “nuk janë pronarë të Kosovës”.
“Ne nuk jemi pronarë të Kosovës ku jetojnë dy milionë njerëz. Nëse dikush guxon të negociojë territorin e Kosovës, kjo është kundër Kushtetutës”, tha Haradinaj në një intervistë për televizionin T7 të Prishtinës.
Ai shprehu i bindjen se me Beogradin do të ishte më e lehtë të arrihej një marrëveshje pasiqë çështja e korrigjimit të kufirit nuk është e hapur, sepse kjo çështje, siç tha ai, “shqetësoi marrëdhëniet e Prishtinës me miqtë e Kosovës”.
Ai gjithashtu foli për darkën në shtëpinë e Thaçit, ku siç tha, iniciues qe kryeministri Rama.
“Ishte një bisedë e kujdesshme mbi tema të njohura: tarifat, dialogu, opsionet për zgjidhjen përfundimtare të çështjes së Kosovës. Nuk kishte ndryshim qëndrimi”, tha Haradinaj.
Njëherësh, ai shprehu rezerva që Rama të ketë një rol qëndror në zhvillimet kosovare.
“E respektoj mendimin e secilit. Rama le të thotë të vetat. Përgjegjësia e tij është Shqipëria. E shoh në rregull deri tani, por nuk duhet t’i japë vetes më shumë ngarkesë sa mund të mbajë. Ne jemi vetë këtu vendimmarrës”, theksoi Haradinaj.
Kështu, shefi i qeverisë së Kosovës i rikthehet një linjeje të mendimit politik apo mediatik të Prishtinës, i cili nuk e pranon protagonizmin e fprtë të Tiranës në zhvillimet kosovare, më saktë Ramës, e kjo për çështje speficifike.
Ndërkohë, muaj më parë, Rama e Haradinaj do nënshkruanin marrëveshje gati “historike” në mbledhjen e përbashkët të dy qeverive në Pejë, ndërkohë që njëri i ka dhënë mbështetje të plotë tjetrit për taksën doganore ndaj Serbisë. /tesheshi.com/
