Nga Blendi Gashi
Darka shtetërore, siç u quajt informale dhe pa kravata (edhe pse Labinot Tahiri pjesëmarrës kishte kravatë) në vilën e Behgjet Pacollit, ka nisur të japë dhe shkëndijat e para të përplasjes mes partnerëve të koalicionit.
Kjo darkë që tregoi jo seriozitetin e institucioneve dhe u kritikua me të madhe nga partitë opozitare dhe shoqëria civile, njëherit përfundimisht rreshtoi Ramush Haradinajn krahë Thaçit dhe kundër Limajt. Ky i fundit hapur ka shprehur pakënaqësinë e tij me darkën në fjalë duke e quajtur gjë jo të mirë, ndërsa si arsye pse mungoi ka dhënë obligimet familjare pa dashur të lëshohet më tej.
“Unë kam pasur obligime të mia familjare. Kam qenë me familje. S’kam telashe të shkoj as te zoti Pacolli, as te askush tjetër, individualisht. Ne mund të shkojmë, miqtë, te secili, te njëri-tjetri. Ju te unë, unë te ju. Dhe, nuk prish punë, po, s’është mirë krejt institucionet me qenë me një vend, vetëm. Ju mund të vini në gëzimin e djalit, vajzës, krejt shteti, por janë edhe qindra tjerë, është banket, festë familjare. Por, me e thirre veç shtetin në shtëpi… sigurisht u pa që s’është mirë. S’u prit mirë nga njerëzit. Duhet të kihet kujdes për këso sendesh”, ka thënë Limaj.
Megjithatë, këtyre kritikave i është kundërpërgjigjur deputeti i AKR-së, Islam Pacolli në seancën e së enjtes. Ai edhe pse nuk përmendi emrin e Limajt la të kuptohet se gjithë mllefin po e zbrazë tek ai, pasi ka përmendur persona që janë përballur me ligjin duke aluduar në Limajn që vazhdon të përballet me procese gjyqësore për rastin e ish-Ministrisë së Transporteve.
“Kemi pas kritika për një darkë të kabinetit qeveritar në vilën e ish presidentit të Republikës së Kosovës, Behgjet Pacolli. Se di kujna i pengon ajo ku nuk preket buxheti i Kosovës. Ose kanë një dhimbje që nuk i kanë restorantet atje për mi qu faturat nëpër restorantet e tyre. Pikërisht ata mund të bëjnë kritika të cilët janë në rregull me ligjin dhe jo ata që nuk janë në rregull me ligjin”, tha Pacolli.
Si Limaj ua bëri bajat darkën bashkëpartnerëve të qeverisë…
Për t’ua bërë bajt këtë darkë dhe për të rikonfirmuar se nuk është në një vijë me Haradinajn e Veselin edhe pse është në bashkëqeverisje me ta, Limaj vetëm tre ditë shkoi tek Menza e Studentëve në darkë me student, ku së bashku me të ishte edhe ministri i Arsimit, Shyqyri Bytyqi që vjen nga partia e tij dhe këshilltarë të afërt.
Limaj ,si në kohën e studimeve priti në radhë ku mori tabakun dhe pasi u shërbye me gjellë, zuri vend në një nga tavolinat pranë studentëve. Pasi përfundoi ushqimin u shpreh i kënaqur me kushtet që ofron kjo qendër.
Kjo vizitë e Limajt, përveç që kishte qëllim të shoh nga afër se si ushqehen studentët, mund të kuptohet edhe si një përçim mesazhi ndaj kryeministrit Haradinaj se në fokus duhet të ketë rinjtë dhe më mirë një darkë pranë studentëve se një darkë luksoze pranë Thaçit.
Dhe veç nëse Haradinaj vazhdon me të vetën dhe të jetë sa më pranë Thaçit, nuk është fare e çuditshme që Limaj t’i ndajë rrugët me të, edhe pse lidhën marrëveshje bashkëpunimi qysh para rënies së qeverisë Mustafa. /tesheshi.com/
