Skuadra e vogël angleze habiti botën e futbollit sezonin e shkuar, kur në mënyrë krejt të papritur fitoi Premier League-n. Befasia me emrin Lestër Siti është zhvendosur tani në Champions League, aty ku surprizat në këtë fazë të aktivitetit janë me pikatore.
Lestër Siti është shndërruar në tre javë. Nga humbja 2- 1 ndaj Seviljes më 22 shkurt, që i dha fund drejtimit të skuadrës nga Claudio Ranieri, kanë pasuar tre fitore domethënëse, më e fundit ajo e mbrëmshmja në Champions League.
Fitorja 2-0 e së martës ndaj skuadrës në vend të tretë në kampionatin spanjoll, e fituese tre herë radhazi e Ligës së Europës, e vë Lestër Sitin mes skuadrave çerekfinaliste të Ligës së Kampionëve; një sukses i jashtëzakonshëm për këtë skuadër.
Morgan e Albrighton shënuan në pjesën e parë e të dytë për vendasit, ndërkohë që për skuadrën mike nga Spanja pati dramë drejt fundit të lojës. Sevilja do të mbetej pa Nasri-n që nga minuta e 74-t, pas nxjerrjes jashtë të tij me dy kartona të verdhë, të shndërruar në të kuqe. Për të ardhur te një 11-metërsh i humbur nga N’Zonzi gjashtë minuta më vonë.
Shumë më e qetë, më pa emocione, qe sfida mes Juventusit dhe Portos në Torino. Ndërsa e kishin fituar takimin e parë 0-2, vendasit fituan dhe të dytin 1-0, me një gol të Dybala-së me 11-metërsh tre minuta para përfundimit të pjesës së parë.
Juventusi siguroi me këtë fitore kalimin për herë të dytë në katër vite në çerekfinalet e Champions League-s, një veprimtari trofeu i së cilës mbetet objektiv ende i papërmbushur për “zonjën e vjetër” teksa po e mbizotëron futbollin italian prej shumë sezonesh. /tesheshi.com/
