Anëtarët kryesorë të grupit OPEC+ kanë vonuar fillimin e rritjes së prodhimit të naftës deri në prill 2025 dhe kanë zgjatur periudhën deri në fund të 2026 për të hequr plotësisht shkurtimet e prodhimit, pasi përballen me kërkesë më të dobët se sa pritej dhe prodhim më të lartë në vendet e tjera.
Grupi OPEC+ (Organizata e Vendeve Eksportuese të Naftës dhe aleatët e tyre si Rusia), që prodhon afërsisht gjysmën e naftës në botë, planifikoi të fillonte reduktimin e kufizimeve të prodhimit nga tetori 2024, por u detyrua të shtyjë fillimin e kësaj mase në disa raste, raporton Reuters.
Në një seri hapash të rënë dakord nga viti 2022 për të mbështetur tregun e naftës, anëtarët e grupit OPEC + ulën prodhimin me 5.86 milionë fuçi në ditë, që është pothuajse 5.7 për qind e kërkesës globale.
Hapat përfshijnë një shkurtim prej dy milionë fuçi në ditë nga i gjithë grupi dhe shkurtime vullnetare në dy faza nga tetë anëtarët – 1.65 milionë fuçi në ditë në fazën e parë dhe 2.2 milionë fuçi në ditë në fazën e dytë.
Anëtarët e grupit OPEC + ranë dakord të vazhdojnë shkurtimet e prodhimit prej dy milionë fuçi në ditë dhe një ulje prej 1.65 milionë fuçi në ditë deri në fund të vitit 2026 në vend të fundit të vitit 2025, siç kishin planifikuar më parë.
Sa i përket reduktimit me 2.2 milionë fuçi në ditë, reduktimi gradual i tij do të fillojë nga prilli i vitit 2025, me rritjen e prodhimit me 138 mijë fuçi në ditë çdo muaj deri në shtator 2026, treguan përllogaritjet e Reuters.
Stopimi i çmimeve të naftës
Grupi OPEC + gjithashtu ra dakord të lejojë Emiratet e Bashkuara Arabe (EBA) të rrisin gradualisht prodhimin me 300,000 fuçi në ditë nga prilli 2025 deri në fund të shtatorit 2026, në vend të një plani të mëparshëm për të filluar në janar 2025.
Pavarësisht uljes së ofertës së OPEC+, çmimi i naftës Brent ka qëndruar kryesisht në intervalin 70 deri në 80 dollarë për fuçi këtë vit, dhe ishte në nivelin më të ulët në shtator kur kushtonte pak më pak se 69 dollarë.
Disa analistë deklarojnë se anëtarët e grupit OPEC+ kanë diskutuar për një rritje të prodhimit që nga qershori, por se ende po e shtyjnë atë dhe se kjo do të thotë se çmimi i naftës nuk do të rritet në vitet e ardhshme.
Ata gjithashtu tregojnë se tregu i naftës tani do ta zhvendosë fokusin e tij në lëvizjet e presidentit të sapozgjedhur të SHBA-së, Donald Trump, i cili mund të vendosë sanksione të reja ndaj Iranit dhe tarifa ndaj Kinës, dhe ka premtuar fundin e luftës ruso-ukrainase.
Anëtarët e OPEC-ut janë Arabia Saudite, Irani, Iraku, Kuvajti, Venezuela, Emiratet e Bashkuara Arabe, Algjeria, Kongo, Guinea Ekuatoriale, Gaboni, Libia dhe Nigeria. Grupi më i gjerë i OPEC+ përfshin gjithashtu Rusinë, Azerbajxhanin, Brazilin, Bahreinin, Brunein, Kazakistanin, Malajzinë, Meksikën, Omanin, Sudanin dhe Sudanin e Jugut. Këto vende nuk janë pjesë e kartelit të naftës, por koordinojnë prodhimin e naftës me anëtarët e OPEC-ut. /tesheshi.com/
