Presidenti amerikan Donald Trump duhet të vizitojë Bosnjen dhe Srebrenicën, për të parë se çfarë mund të ndodhë kur ne dështojmë në veprimin kundër ekstremizmit etnik, është një koment i publikuar nga Frida Ghiti, në faqen e CNN.
Duke analizuar sjelljen e Presidentin amerikan në lidhje me protestat e dhunshme të krahut të djathtë dhe një valë dhune që ka ndodhur në Shtetet e Bashkuara, komentatorja e CNN-it, këshillon Trump që të bëjë një udhëtim në Bosnje.
Në artikullin e shkruar, Ghiti përkujtoi mikun e saj nga Bosnja, Haris Hurema, i cili njëkohësisht punonte si përkthyes i CNN në vitin 1995.
“Miqtë dhe të afërmit e tij në Sarajevë kurrë më parë nuk e kanë ditur se cili është musliman dhe cili është serb i Bosnjes.
Por në atë vend shpërtheu nacionalizmi dhe ekstremizmi, dhe për më tepër politikanët karizmatik vetëm sa i hodhën benzinë zjarrit.
Një ditë prej ditësh, Haris ishte duke luajtur me letra me të afërmit e tij në Sarajevë, kur erdhi policia, i arrestoi për shkak se ishin muslimanë.
Haris kurrë më parë nuk kishte hyrë në xhami, por ai u dërgua drejt e në kamp. Shoqëria multietnike filloi të shpartallohej”, shkruan Ghiti.
Rrethanat në Bosnje dhe Gjermaninë naziste ishin më ndryshe nga ato në SHBA sot, thekson Ghiti, duke shtuar se nuk pret që në SHBA të shpërthejë ndonjë luftë civile.
“Mendoj se Trump nuk është i vetëdijshëm se sa e rrezikshme është sjellja e tij. Por, në qoftë se ai e di se si po vepron, atëherë problemi është shumë më i madh se sa mendonim dhe ky moment në histori është shumë më i rrezikshëm”, shkruan Ghiti.
Ajo është gazetare që ka mbuluar ngjarjet gjatë luftës në Bosnje dhe Kosovë për kanalin televiziv prestigjioz CNN. /tesheshi.com/
