Ambasadori i Shteteve të Bashkuara, Donald Lu pritet të bëjë deklaratën më të ashpër për reformën në Drejtësi, e që ka gjasa të përmendë edhe emra konkretë.
Burime pranë mazhorancës bëjnë të ditur se orët në vijim, komisioni parlamentar për reformën në Drejtësi do të mblidhet për të miratuar nen për nen të gjithë draftin e reformës kushtetuese dhe për ta çuar më pas atë në seancën parlamentare të radhës.
Pas kësaj mbledhjeje, ambasadori Donald Lu pritet të mbajë një fjalim për publikun shqiptar, e cila do të jetë ndoshta e fundit deklarative, pasi pas kësaj priten veprime.
Ndërkaq, në Tiranë mbërrin për një vizitë njëditore shefi i diplomacisë gjermane, Frank Walter Steinmaier, i cili do të provojë pjesën e fundit të negociatave pasi ka të gjitha parametrat për të qenë një ndërmjetësues mjaft autoritar.
Steinmaier është socialdemokrat, pra aleat i socialistëve në PSE, ndërkohë që është numri dy i qeverisë së kancelares Merkel, aleat i PD-së në PPE, dhe mbi të gjitha është përfaqësues i vendit më të fuqishëm të Europës.
Por siç mësohet, ministri i Jashtëm gjerman do të mbajë një fjalim të fortë gjatë takimit me homologun Ditmir Bushati, e mbi të gjitha, në kryeministri së bashku me Edi Ramën.
Qëndrimi i LSI-së gjatë së hënës, duket se ka acaruar paksa Edi Ramën dhe diplomatët e SHBA-së dhe BE-së, pasi është tentuar të rikthehet procesi nga fillimi dhe të rishikohet drafti.
Siç mësohet, gjatë takimit që kanë zhvillur ambasadorët e SHBA-së dhe BE-së me Edi Ramën në kryeministri, është folur pikërisht për ofertën e Metës që vinte edhe si mesazher i Lulzim Bashës pas takimit të tyre të dielën e 12 qershorit.
Dhe ajo që nuk është bërë publike fare, ka qenë pikërisht kleçka më e madhe, apo ajo që është kthyer në “nyjen gordiane” të reformës në Drejtësi, pikërisht komisioni që do të kalojë në sitë gjyqtarët dhe prokurorët.
Si Berisha-Basha, ashtu dhe Meta kërkojnë qasje në këtë komision, por amerikanët nuk lëshojnë, pasi ata do të financojnë të gjithë procesin e hetimit të zyrtarëve të korruptuar, pra trajnimin e hetuesve të Byrosë Kombëtare të Hetimit dhe rrogat e tyre.
Madje ka gjasa që të financohen edhe rrogat e prokurorëve dhe gjyqratëve e që në total bëjnë një mijë persona.
Pas takimit me ambasadorët, Edi Rama përmendi për herë të parë vijën e kuqe dhe për herë të parë çështjen se bëhej fjalë për komisionin e “tërmetit”, siç shprehet kryeministri. Kjo pasi lufta më e madhe nuk bëhet për emërimin e të rinjve në sistemin e drejtësisë, por në mbajtjen e atyre që janë aktualisht.
Dhe siç po ndodh, gjyqtarët e prokurorët që e shikojnë veten në rrezik po reagojnë egër duke shpallur një luftë të hapur me qeverinë. Kanë arrestuar së fundi një kryetar bashkie dhe pritet të risin dozën me zyrtarë, madje edhe me ndonjë ministër.
Por dorëheqja e Shkëlqim Hajdarit, i njohur si një nga prokurorët më integritet dhe pjesëtar i bërthamës tashmë të shkatërruar që hetuan të parin krim ndaj politikës në Shqipëri, siç ishte vrasja e Azem Hajdarit, duket se shkaktoi një eksplozion brenda çatisë së gjyqësorit, që pritet të ketë një tronditje tjetër në orët e ardhshme.
Ndoshta pak e besojnë, por realisht ka shpërthyer një luftë shumë e madhe, që sipas gjasave do të ketë pasoja jo të vogla. Po shohim vetëm fillimin…
Y.Pata – /tesheshi.com/
