Vendi po shkon drejt 18 qershorit në një përplasje të madhe ku padyshim i ngjan në dukje dy trenave që vijnë me shpejtësi marramendëse dhe bëhen copash me njëri-tjetrin, por që në fakt nuk është e tillë.
Edhe pse përplasja është evidente, madje kërcënuese, po vijmë drejt një momenti ku njëri nga aktorët politikë, Edi Rama apo Lulzim Basha do të pësojnë ose triumfin më të madh ose shuarjen përfundimtare të karrierës dhe madje më keq; ose do të ndodhë që të dalin të dy partitë e mëdha nga loja dhe të skena të nxjerrë aktorë të rinj që mund të nxiten nga rrethanat.
Por realisht vendi shkon drejt një skenari përfundimisht të paprecendent deri tani.
Vetëm njëherë Partia Demoratike ka provuar që të mos marrë pjesë në një votim kombëtar që sigurisht nuk ishte zgjedhje politike por referendum kushtetues.
Në vitin 1998, Sali Berisha lideri i atëhershëm i PD-së, kërkoi që mbështetësit e tij të bojkotonin referendumin për Kushtetutën e miratuar vetëm nga mazhoranca e majtë, si pasojë e bojkotit të PD-së në Parlament.
Në zgjedhje shkuan rreth 1 milionë zgjedhës dhe “Po”-ja fitoi me 92%.
Nëse e krahasojmë me numrin e përgjithshëm të votuesve të regjistruar, morën pjesë vetëm 51% e tyre, por realisht në lista dihet se ekzistojnë rreth 1 milionë emigrantët që ndodhen nëpër botë.
Kushtetuta hyri në fuqi, edhe pse nuk u njoh nga PD-ja; ajo funksionoi deri në vitin 2002 kur PD u rikthye në Kuvend pas një kompromisi me Fatos Nanon për Presidentin e Republikës.
Dhe më pas kur erdhi në pushtet në vitin 2005, PD-ja jo vetëm që e njohu Kushtetutën e bojkotuar, por Sali Berisha u betua më 21 janar se për Kushtetutën ishte gati që të qëllonte edhe mbi 200 apo 2000 vetë që do të sulmonin Kryeministrinë, pra atw qw kishte bojkotuar pak vite mw parw.
Të vijmë tek zgjedhjet.
Në vitin 2013 më 28 qershor votuan 1 milionë e 7 qindmijë zgjedhës. 1 milionë i mori aleanca e PS-së me LSI-në dhe aleatët e vegjël, 450 mijë i mori aleanca e PD-së me të vegjlit dhe rreth dyqindmijë morën të tjerët.
Nëse në zgjedhjet e 18 qershorit, 15 partitë e regjistruara në zgjedhje ja dalin që të sjellin në votime të paktën 1 milionë e 400 mijë votues, atëherë legjitimiteti moral i zgjedhjeve blindohet plotësisht.
Nëse në votime dalin 1 milionë apo pak më shumë, mund të kemi legjitimitet ligjor por jo real. Vetëm atëherë pritet që të ndërhyjnë ndërkombëtarët për të dhënë një verdikt që vullneti popullor nuk ka qenë i plotë për qeverisjen.
Në vitin 2001, SHBA dhe BE edhe pse i dhanë legjitimitet zgjedhjeve që prodhuan qeverisjen e PS-së, pra të Ilir Metës kryeministër, ata nuk njohën mazhorancën e cilësuar për të zgjedhur presidentin e Republiës, pasi sipas tyre arritja e kësaj mazhorance u trukua.
Nëse Edi Rama arrin që të mbajë zgjedhje totalisht jashtë çdo dyshimi për manipulime dhe nxjerr në votime jo vetëm përkrahësit e tij, pra 1 milionë shuplakat, atëherë PD do të shënojë përfundimisht mbylljen e misionit të saj historik dhe do të nisë rithemelimi i saj, siç u parashikua edhe nga Majlinda Bregu në mbledhjen e grupit parlamentar, gjatë ditës së djeshme.
Por problem është se për të arritur këtë, Lulzim Basha nuk e bën në mënyrën klasike, pra që i thotë mbështetësve të tij: “mos dilni në zgjedhje” dhe kaq, por shkon në ultimatumin që s’do të ketë zgjedhje dhe paralajmëron një përlasje civile.
Të parën, të shtunën e ardhshme që thotë se do të implementojë skenarin e Kavajës.
Dhe siç thotë me të drejtë Pandeli Majko, nëse kërcënohet skenari jashtë sistemit, atëherë politika e ka mbyllur misionin.
“Tani rruga e Partisë Demokratike kërkon ndricim më shumë se shpejgim. Kjo e fundit nuk ekziston. Bllokimi i zgjedhjeve që vinë ndodh vetëm me dhunë. Dhuna dhe Republika e saj nuk është alternativë politike. Përpara se të ulërasim duhet të mendojmë si të shpëtojmë vendin! Dhuna nuk është as zgjedhje dhe as zgjidhje. Sigurisht!..”, thekson Majko… /tesheshi.com/
