Liga e Kampioneve i ka patur të gjitha brenda në ndeshjet e së mërkurës. Ka pasur humbjen e kampionëve në fuqi të Realit, që u mund keqas në Londër 3-1 nga Totenhem, ku shkëlqen Dele Ali me 2 gola dhe e shoqëron Eriksen në tabelën e golashënuesve.
Ronaldo plotësoi rezultatin, duke përmirësuar rekordet personale, por Reali humb kryesimin në grup, e duhet ta shohë nga poshtë lart Totenhemin.
Ka patur intensitet dhe gola këtë turn, vecanërisht në ndeshjen Napoli-Manchester Sity, ku trajnerët Guardiola e Sarri përgatitën një spektakël pasimesh dhe aksionesh “me një frymë”. Në fund fitojnë britanikët 2-4, ku Otamendi, Stouns, Aguero e Sterling, shënuan për Sity-n, ndërsa Insinje e Zhorzhinjo për Napolin. Me golin në këtë ndeshje, argjentinasi Aguero u bë shënuesi më i mirë në historinë e Manchester Sity-t me 178 gola, duke kaluar legjendën Bruks që kishte shënuar 177.
Por ndeshjet e së mërkurës kanë qenë të hidhura për skuadrat gjermane, pasi Borusia e Dordmundit e sheh veten thuajse të pakualifikuar, pas barazimit “të ngordhur” me Apoelin 1-1. Pak shanse ka për të luajtur përtej fazës së grupeve edhe Lajpcig, që u mund nga Porto 3-1.
Liverpul e Sevilja e kishin ditën e “ngritjes së kokës” të mërkurën. Spanjollët mundën 2-1 rusët e Spartakut të Moskës, ndërsa britanikët, i dhanë një 3-0 të pastër Mariborit, duke marrë kryesimin e grupit, të ndjekur nga Sevilja. /tesheshi.com/
