Manchester United i ka thënë lamtumirë Ligës së Kampioneve, për t’i bartur valixhet tek kompeticioni i dytë për nga rëndësia në kontinentin e vjetër, Ligën e Europës. Udhëtimi në Gjermani u bë mankth për djajtë e kuq, që u mposhtën nga skuadra Wolfsburg (3-2), për tu përshëndetur kështu, ndoshta para kohe nga kompeticioni që ishte objektivi kryesor për skuadrën e drejtuar nga Luis van Gaal.
Ndërkohë, PSV Eindhoven ka përfituar nga rasti në duelin tjetër të grupit B, duke triumfuar në shtëpi ndaj rusëve të CSKA Moskës, (2-1).
Kështu, Wolfsburg dhe PSV, kalojnë në fazën tjetër të garave, ndërsa Manchester United do vazhdojë garat në Ligën e Europës.
Juventus dënohet nga “ish” i tyre, për të përfunduar në pozitën e dytë në grupin D. Finalistët e edicionit të shkuar në Ligën e Kampionëve, e ngritën flamurin e bardhë në Sanchez Pizjuan, përballë Sevillas, (1-0). Me këtë rast, 
spanjollët rrëmbejnë pozitën e tretë në renditjen tabelare që i mundëson atyre t’i vazhdojnë garat në Ligën e Europës, për ta mbrojtur titullin.
Më së shumti. nga kjo situatë kanë përfituar djelmoshat e Manuel Pellegrinit që falë fitores ndaj gjermanëve të Borusia Monchengladbach (4-2), rrëmbejnë pozitën e parë në klasifikim. Manchester City kështu pas shumë viteve do të jetë në vazon e parë të shortit, duke eleminuar kështu bigët e tjerë të europës.
Real Madridi nuk pati aspak mëshirë për suedezët e Malmoes (8-0), ne një ndeshje që ishte e vlefshme vetëm për statistika. Njësoj sikurse ka bërë edhe Paris SG përballë Shakhtar Donetsk (2-0). Kështu, madrilienët dhe parisienët presin të mësojnë kundërshtarët për fazën e rradhës të garave, ndërkohë Shakhtar Donetsk vazhdon garat në Ligën e Europës.
Atletico Madrid ka përfunduar me sukses fazën e grupeve, duke u renditur si e para në grupin C. Skuadra e drejtuar nga Diego Simeone ka bërë goditjen e fundit, pasi mposhti në udhëtim portugezët e Benficas (1-2). Gjithsesi, dy skuadrat do vazhdojnë garat më tej në Champions, ndërkohë Galatasaray mjaftohet me Ligën e Europës, pas barazimit në shtëpi ndaj Astanas, (1-1).
/tesheshi.com/
