Tetë takimet e javës së tretë në katër grupet e para të Champions League-s kanë sjellë shumë më tepër emocion se ato të mbrëmjes të së martës.
Për të filluar me kryendeshjen Barcelona – Mançester Siti, që risillte në “Camp Nou” të famshmin Guardiola, strategun e Barçës së erës së re.
Një kthim që nuk ka rezultuar aq fatlum për teknikun e Mançester Sitit, pasi anglezët kanë humbur 4-0. Ka qenë si një “përplasje dere në fytyrë” për Guardiola-n, që po kalon një moment jo të mirë. Mançester Siti nuk arrin të fitojë prej 24 shtatorit, me dy humbje e dy barazime në kampionatin anglez e në Ligën e Kampionëve.
Fitorja e Barcelonës ka patur për protagonist Lionel Messi-n, që i ka shënuar tre prej golave. Neymar ka gabuar nga pika e 11-metërshit në minutën e 87-të, për ta korrigjuar shënjestrën dy minuta më pas. Nuk kanë munguar dhe kartonat e kuq në këtë takim: fillimisht është larguar portieri Bravo për miqtë, e më pas Mathieu për vendasit.
Rezultati më befasuese ka qenë ai në “San Paolo”, ku Napoli i është nënshtruar lojës efikase të turqve të Beshiktashit, që kanë fituar 2-3.
Elseid Hysaj është lënë në stol, ndërsa Maurizio Sarri ka bërë disa ndryshime nga formacioni që luajti ndaj Romës. Por as këto ndryshime nuk e kanë shmangur humbjen.
Napoli është në krizë. Ja çfarë ndodh me të: humbet më 2 tetor 1-0 me Atalantën, humbet të shtunën e shkuar 1-3 me Romën, e mbrëmë humbet 2-3 me Beshiktashin.
Megjithatë, mund të kishte shkuar ndryshe nëse Insigne do të kishte shënuar nga pika e 11-metërshit në minutën e 50-të.
Fitorja më e thellë e gjashtëmbëdhjetë takimeve të këtyre dy ditëve ka për protagonist Arsenalin, që shkërmoq 6-0 Ludogorecin në “Emirates Stadium”. Lojtari i mbrëmjes është Mesut Özil, shënuesi i një tregolëshi.
E pastër ka qenë fitorja e PSG-së ndaj Bazelit të Taulant Xhakës. Di Maria, Lucas Moura dhe Cavani ishin shënuesit në fitoren 3-0.
Me të njëjtin rezultat, 0-2, kanë fituar në transfertë Benfika dhe Borusia e Mynshegladbahut, përkatësisht ndaj Dinamos së Kievit dhe Sëlltikut të Glasgout.
Atletiko e Madridit është treguar cinike si gjithmonë, duke fituar 0-1 ndaj Rostovit.
Pas barazimeve në Bundesligë, Bajerni i Mynihut e gjen fitoren në Champions, teksa mposht 4-1 holandezët e PSV Eindhovenit. /tesheshi.com/
