Bajerni i Mynihut ka ndërruar trajner, por ende nuk ka mësuar se si mund të fitojë ndaj Atletikos së Madridit.
Pak muaj më parë Atletiko e eliminonte Bajernin në gjysmëfinalet e Champions League-s, e në të njëjtin aktivitet, veçse në ndeshjet në grupe, spanjollët dalin rishtas fitues.
Në takimet e javës së dytë të fazës në grupe të Ligës së Kampionëve, Atletiko e Madridit ka fituar 1-0 ndaj Bajernit të Mynihut, në një ndeshje me shumë ritëm e të fortluftuar.
Carrasco qe shënuesi i të vetmit gol, që erdhi në minutën e 35-të, ndërsa Griezmann nuk ia doli ta thellonte rezultatin gjashtë minuta para mbarimit të lojës, kur goditi traversën nga pika e 11-metërshit.
Në përballjen mes vëllezërve Xhaka, buzëqeshja ka qenë për Granitin. Arsenali e ka mposhtur 2-0
Bazelin falë dy golave të Walcott-it.
Napoli ka fituar 4-2 ndaj Benfikës, me Elseid Hysajn gjatë gjithë kohës në lojë.
Pa Messi-n në fushë, Barcelona ka mundur sërish të dalë e fituar. Në Gjermani, ndaj Borusias së Mynshegladbahut, katalanasit kanë përmbysur epërsinë e vendasve, duke fituar 1-2. Arda Turan e Pique ishin shënuesit për Barçën.
Sëlltiku i Glasgout ka meritën e frenimit të Mançester Sitit pas thuajse dy muajsh. Që nga 13 gushti, për skuadrën e Guardiola-s ka patur vetëm fitore. Seria e dhjetë fitoreve të tilla është ndërprerë me barazimin 3-3 në “Celtic Park” të Glasgout. Vendasit kaluan tre herë në avantazh, e po kaq herë barazuan miqtë.
Në takimet e tjera të së mërkurës, Ludogorec u mund 1-3 nga PSG-ja, Beshiktashi dhe Dinamo e Kievit u ndanë në barazim 1-1, e po në barazim, 2-2, përfundoi dhe përballja Rostov – PSV Eindhoven. /tesheshi.com/
