Çfarë fshihet pas dorheqjes së dyshes Mijallkov–Jankullovksa?! – dyshimi se kanë bashkëpunuar me grupin e armatosur të Kumanovës!

Dorëheqjet e papritura të Shefit të Drejtorisë për Siguri dhe Kundërzbulim (DSK), Sasho Mijallkov dhe Ministres së Brendshme, Gordana Jankullovska, kanë ardhur pas takimit që kanë patur në Ambasadën Amerikane në Shkup, burime të së cilës  njoftojnë se shërbimet amerikane, u kanë dhënë atyre inçizime me biseda të punonjësve të DSK-së me liderin e grupit të armatosur nga incidenti në Kumanovë, të ashtuquajturin “komandant NATO”, që dëshmojnë për bashkëpunimin mes tyre.

Në bisedat telefonike, sipas burimeve, dëshmohet se DSK është futur në negociata me grupin e Kumanovës, për çka punonjës shqiptarë kanë biseduar me grupin duke përcjellë porosinë e vet shefit të tyre i cili pyet se çka kërkojnë në këmbim të tërheqjes.

Këto burime gjithashtu njoftojnë se, faktet i janë thënë edhe Ali Ahmetit, i cili më herët kishte negociuar me OSBE-në dorëzimin e disa pjestarëve të grupit policisë, pasi aty ka patur tre njerëz të tij.  Të përballur me këto të dhëna, dhe frika për pasojat, ministrja Jankullovska dhe Mijallkov kanë dhënë dorëheqje, të cilat kryeministri Gruevski i ka pranuar. Por, që këto dorëheqje të papritura të marin kuptim logjik, ai e paketon me pretendimin për rekonstruim të qeverisë.

Më herët, Xhezair Shaqiri i njohur si komandant Hoxha, në një paraqitje mediale akuzoi shërbimet sekrete të Maqedonisë se kanë qenë në kontakt të vazhdueshëm me grupin e armatosur për muaj me radhë para aksionit policor, për çka tha se ka qenë i përfshirë agjenti i Shërbimit të Inteligjencës për Zbulim që është nën kompetencë të presidentit Gjorge Ivanov: “Unë kam dëshmi, para dy muaj e gjysmë, Sh. M., agjent që është nën urdhrat e kryetarit të shtetit Gjorge Ivanovit, ka pasur takim me dy persona të cilëve u përmendet emri këtu, jo vetëm Sokoli. Ai takim është incizuar fjalë për fjalë, çfarë kanë kërkuar ato prej këtyre djemve”, tha Xhezair Shaqiri – Hoxha.

Edhe televizioni KohaVision, pretendon të ketë informata konfidenciale për bashkëpunimin e shërbimeve Maqedonase me grupin e Kumanovës. Sipas televizionit në fjalë, Agjencia e Kosovës për Intelegjencë qysh në muajin shkurt kishte njoftuar mekanizmat, të cilëve është e obliguar ligjërisht t’iu raportojë, për dyshimet se disa kosovarë do të tentonin të destabilizonin Maqedoninë.

Në njoftimin që AKI-ja iu kishte bërë institucioneve, theksohej se Shërbimi Sekret Maqedonas kishte tentuar të kontaktonte disa shtetas të Kosovës, të cilët do të merrnin përsipër aksionin, ndërsa në lojë janë gjithë skenarët e mundshëm të inskenimit të një akti terrorist,  ku protagonistë do të ishin shqiptarët. Raporti i referohet edhe aferës së përgjimeve dhe daljes në opinion të manipulimeve në rastin “Monstra”. /tesheshi.com/