Një shpërthim në metronë e Londrës ka shkaktuar 20 të plagosur, disa prej të cilëve kanë lëndime në fytyrë.
Dëshmitarët në vendngjarje flasin për një shpërthim flakësh dhe panic mes njerëzve që vrapuan të tmerruar.
Policia gjeti një kovë të mbushur me lëndë plasëse në vagonin e njërit prej trenave në stacionin Parsons Green, ku shërbimet për momentin janë pezulluar.
Mekanizmi i improvizuar shpërthyes nuk ka shkaktuar dëme të mëdha, por policia po e trajton si episod me sfond terrorist. Ekspertët flasin për një bombë artizanale aspak të sofistikuar. Udhëtarët janë evakuar me shpejtësi, ndërsa zona është mbushur menjëherë nga forca të shumta policore.
Scotland Yard-i ka zgjedhur ta mbajë publikun të informuar përmes rrjeteve sociale Twitter e Facebook, ku sqaron se do të ofrojë informacione të detajuara sapo të zbardhet situata.
Përdoruesit e kësaj linje janë këshilluar që të gjejnë rrugë alternative e të shmangin sa më shumë që të munden zonën e rrethuar nga policë të armatosur.
Të lënduarit kanë pasur plagë, por edhe djegie në pjesë të fytyrës e në gjymtyrë.
Kryeministrja Theresa May pritet të mbledhë pasdite në një takim urgjent komitetin qeveritar të emergjencave Cobra, ku të diskutohet mbi ngjarjen e sotme. /tesheshi.com/
