Ndryshe dy çerekfinaleve të para, dy të fundit e Kupës së Amerikës kanë dhuruar bollëk golash.
Fillimisht do të ishte Argjentina që do ndeshej me Venezuelën me të nisur dita e sotme. Golashënuesi më i mirë i kampionatit italian, Gonzalo Higuain, do të shënonte dy gola brenda 28 minutave të para. Lojtarët e Venezuelës mund ta kishin ngushtuar rezultatin në minutat vijuese, por Romero, portieri argjentinas, do të tregohej në lartësinë e detyrës.
Messi do ta thellonte rezultatin në minutën e 60-të, e Lamela do të bëhej protagonist po ashtu me golin e
tij në minutën e 71-të.
Futbollistët venezuelas do të ngushëlloheshin me golin e nderit, të realizuar nga Rondon në minutën e 70-të.
Edhe pse bënë një figurë të mirë në një pjesë të lojës, modestët e Venezuelës nuk mundën t’i përballonin yjet e Argjentinës.
Këta të fundit kaluan në gjysmëfinale me fitoren 4-1.
Dhe në çerekfinalen e fundit, mbajtësit e trofeut, kilianët, janë treguar të pamëshirshëm ndaj meksikanëve.
“Nata më e errët në historinë e futbollit meksikan” e ka quajtur një gazetar meksikan. Kili ka turpëruar Meksikën me një rezultat tenistik, 7-0!
Seria e meksikanëve me 22 ndeshje pa humbur ka patur një fund tragjik, me një humbje turpëruese, që ka për të lënë gjurmë në futbollin e këtij vendi.
Eduardo Vargas, i cili do të kishte rol të veçantë në suksesin e vitit të shkuar, kur Kili do ta fitonte për herë të parë Kupën e Amerikës, ka shpërthyer me katër gola të shënuar. Dy gola të tjerë janë realizuar nga Puch, e një nga Alexis Sanchez.
Gjysmëfinalet kanë vënë përballë SHBA-të me Argjentinën dhe Kolumbinë me Kilin. Dy takimet do të luhen të mërkurën dhe të enjten. /tesheshi.com/
