Skuadra londineze e Çelsit është shumë pranë fitimit të kampionatit anglez. Në tre ndeshje të mbetura për të, mjafton të fitojë njërën prej tyre, dhe trofeu i Premier League-s do të garantohet.
Çelsi fitoi mbrëmë 3-0 ndaj Midëllsbrout, duke iu afruar vetë suksesit e duke e zbritur kundërshtarin një kategori më poshtë.
Një fitore të premten në transfertë ndaj Uest Bromuiçit do ta bënte Çelsin të pakapshëm në klasifikim, për ta kthyer atë te titulli i Premier League-s pas vetëm dy vitesh.
“Ky hap,” thotë tekniku i Çelsit, Antonio Conte, për fitoren ndaj Midëllsbrout, “ishte i madh për ne. Një fitore e madhe. Tani na duhet të bëjmë një tjetër hap. Kemi mundësi ta bëjmë këtë të premte kundër Uest Bromuiçit, por nuk do të jetë e lehtë.”
Antonio Conte bëhet gati të fitojë trofeun e parë në sezonin e tij të parë në futbollin anglez.
“Objektivi është shumë pranë, dhe ne duhet të kemi entuziazëm, vullnet e dëshirë për ta arritur atë. Lojtarët e mi meritojnë ta fitojnë ligën.” /tesheshi.com/
