Serbisë i është shuar shpresa për ta zhbërë pranimin e Kosovës nga organi më i lartë drejtues i futbollit në Europë.
CAS-i, Gjykata e Arbitrazhit Sportiv, e ka rrëzuar ankimimin e federatës serbe të futbollit kundër pranimit të Kosovës në UEFA.
Gjykata është shprehur në vendimin e saj se Kosova i përmbushte standardet e rregullave të hyrjes në UEFA sepse ishte njohur nga shumica e vendeve anëtare të OKB-së si një shtet i pavarur.
Kosova u njoh nga UEFA në majin e vitit të shkuar, një njohje e pasuar nga ajo e FIFA-s. Përfaqësueses së Kosovës iu dha më pas mundësia që dhe të përfshihet në eliminatoret europiane për Botërorin 2018.
Vendimi i CAS-it është një tjetër goditje për përpjekjet e Serbisë për ta penguar Kosovën në rrugëtimin e saj si shtet i mëvetësishëm. /tesheshi.com/
