Disa deklarime nga ministri grek i Mbrojtjes, Panos Kamenos, e kanë tensionuar sërish raportet me sy vendeve. Gjatë një vizite në postën kufitare greke në Molivdhoskepasti, në kufi me Shqipërinë, kreu i Mbrojtjes greke tha se “deklaratat e fundit të zotit Rama nuk kanë bazë historike”. Kamenos, qëllimisht dhe me mesazh të qartë nuk e ka artikluar fjalën “çam” apo “Çamëri”, por i ka lënë ato të nënkuptuara duke i akuzuar si bashkëpunëtor të nazistëve, teza kjo kryesore justifikuese për dëbimin e kësaj popullate shqiptare pas Luftës së Dytë Botërore.
“Ata për të cilët ai flet ishin bashkëpunëtorë të nazistëve, ishin ata që qëndruan në anën e të humburve në luftë. Ne nuk do pranojmë këto sfida, këto deklarata që fyejnë historinë dhe të drejtën ndërkombëtare”, ka thënë Kamenos, duke iu drejtuar kryeministrit Rama në distancë.
Dhe ka reaguar menjëherë, jo shefi i qeverisë, i cili një natë më parë në Top Story e shtoi akoma dhe më tepër dozën e tij “anti-greke” lidhur më çështjen çame, por PDIU e Shpëtim Idrizit.
“E vërteta është krejtësisht e kundërta e asaj që tha kryetari i një partie antisemite, antieuropiane, parti me frymëzim fetar fondamentalist.
Kur politika e jashtme bëhet nga ministri i Mbrojtjes veshur me rroba lufte, në një zonë kufitare, mund të presësh vetëm deklarime të tilla absurde.
Çështja çame është një çështje genocidi të Greqisë, që u zhvillua në mënyrë të pandërprerë nga paraardhësit e Kamenos, për ta përmbyllur me spastrimin e këtij komuniteti në fund të Luftës së Dytë Botërore.
Greqia e Zervasit spastroi gjithë komunitetet e huaja, madje duke bashkëpunuar me gjermanët dhe është e pafalshme që këto vepra kriminale të justifikohen sot nga politikanë të demokracisë.
Helmimi i historisë dhe po ashtu i së drejtës ndërkombëtare, për të cilën flet Kamenos, vazhdon prej politikanëve si ai që duan të vetidentifikohen si pasuesit e Zervasit.
Kamenos nuk mund ta ndalë në asnjë mënyrë as rikthimin e dinjitetit në politikën e jashtme shqiptare dhe as ndërkombëtarizimin e çështjes çame, që u duk qartë në letrën e komisionerit europian Hahn.
Ne duam t’i themi këtij ministri anti-semit e anti-europian se, komuniteti çam nuk mund të vizatohet sot në kohë lirie si komunitet bashkëpunëtor i nazizmit.
Lexoni historianët realistë grekë, lexoni burimet amerikane që konfirmojnë se pikërisht mosbashkëpunimi i shqiptarëve çamë me pushtuesit italianë solli dështimin e tyre në Greqi.
Por Kamenos, i ngrehur me rroba ushtarake, do të lexojë vetëm historinë që shkroi Zervas me gjakun e mijëra grave, pleqve dhe fëmijëve çamë”, thuhet në deklaratën e PDIU-së. /tesheshi.com/
