Nga Ylli Pata
Çamë në Shkodër?! Natyrisht që ka shumë pak, por padyshim që më shumë se në Dibër, ku aleanca mes PS-së dhe PDIU-së rezultoi efikase.
Siç mësohet, koalicioni i Edi Ramës me çamët jo vetëm që është i fortë por pritet të kthehet në aleancën strategjike për 2017-ën.
Plani i Kryeministrit shqiptar është i qartë: aty ku mendohet se janë bastionet e PD-së, ai do të dërgojë “grupin e gatshëm” të PDIU-së për të zgjidhur situatën.
Dhe njeriu adapt për këtë operacion duket se është Aqif Rakipi, një peqinas por që ka lidhje më shumë se horizontale me grupe të mëdha interesi në çdo cep të Shqipërisë.
Çamët janë parë këto ditë në Shkodër ku pritet të instalohen dhe të zgjerojnë aktivitetin e tyre me segmente të të fortëve të politikës së 20 viteve, kryesisht nga e djathta por që përfaqësojnë grupe interesi.
Pas Dibrës, kryeministri Edi Rama do të aktivizojë çamët në bastionet e Partisë Demokratike në zgjedhjet parlamentare të 2017.
Partia e çamëve dha një kontribut të madh në fitoren e Bashkisë Dibër, pavarësisht rolit të Lëvizjes Socialiste për Integrim, aleat i PS në qeverisje. Përfaqësuesit e PDIU qëndruan me ditë të tëra në Dibër, derisa përfundoi rezultati në favor të kandidatit të PS-së, Muharrem Rama.
Dhe plani i Ramës është që të aktivizojë çamët në bastionet e Partisë Demokratike. Fushata e çamëve duhet të jetë po aq e fuqishme si në Dibër.
Në zgjedhjet e 2015, PD arriti të marrë 15 bashki, përfshirë edhe Shkodrën, ku Rama mendonte se e kishte të sigurt fitoren me Keti Bazhdarin.
Kryeministri do t’i japë prioritet Shkodrës për të aneksuar bastionin e PD-së në zgjedhjet e përgjithshme, duke pasur parasysh edhe “armiqësinë” që ka me kryetaren e bashkisë, Voltana Ademi.
Sipas burimeve, gjatë këtyre ditëve, çamët janë parë në Shkodër duke u përpjekur që të fitojnë sa më shumë terren. E njëjta gjë do të ndodhë edhe në bashkitë e tjera të PD-së, duke bërë që në këtë rast roli i LSI të zbehet. Edhe në Dibër, për shkak edhe të konflikteve me PS-në për marrëveshjen e pushtetit vendor, roli i LSI-së në fushatë nuk u ndje shumë.
Aqif Rakipi, i ashtuquajturi “providencë” e PDIU-së, një biznesmen me lidhje të pafundme në çdo rreth të vendit, është kthyer në njeriun që Edi Rama takon më shpesh.
Javën e shkuar kryeministri drekoi në Peqin në një lokal dasmash me deputetin e PDIU-së, Qifin siç e thërret eprori i tij, Idrizi, duke e ditur se dikush po i fotografonte për ta hedhur më tej në rrjetet sociale.
Sidomos tani që po sulmohet nga grekët që kanë një fuqi potenciale në Shqipëri, kryeministri po mbrohet nga një antikorp i fuqishëm kundër tyre që janë çamët. Dhe në fakt ky komunitet ka edhe të drejtën morale dhe ligjore për të mbrojtur të drejtat e tyre. /tesheshi.com/
