Një takim jo-formal i kryeministrave të rajonit organizuar në Durrës, ka qenë gjysmak për shkak të mungesës së tre prej tyre. Edhe pse me prezencën e komisionerit Hahn, tryeza ku do të diskutohej ndërveprimi ekonomik rajonal ka qenë e paplotë.
Kryeministri Rama, si nikoqir i takimit, ka qenë ai që ka shpjeguar mungesat.
“Përfitoj nga rasti ti shpreh ngushëllimet tona, kryeministrit Borisov për aksidentin tragjik ku kanë humbur jetën shumë persona, është bërë shkak për anulimin e ardhjes së tij.
Po ashtu Kryeministri i Maqedonisë pas më shumë se një orë në Aeroportin e Shkupit, e ka pasur të pamundur për shkak të kohës.
Kryeministrja serbe na ka përcjellë keqardhjen për pamundësinë. Megjithatë besoj që kemi zhvilluar një takim të frutshëm, të dobishëm duke bërë një bilanc të ecurisë së procesit të krijimit të zonës rajonale ekonomike, duke parë më radhë të gjitha aspektet e këtij procesi, qoftë ato që kanë ecur si duhet qoftë ato që kanë nevojë për një shtysë të fortë”, tha Rama.
Siç mund të vërehet, vetëm arsyeja e kryeministrit bullgar ka qenë e qartë.
Fjalën e morri dhe komisioneri Hahn, që tha se “diskutuam për integrimin ekonomik, për atë që është realizuar deri tani, që është mbresëlënëse. Janë hapur 80 000 vende të reja pune në të gjithë rajonin, si rezultat i rritjes së ekonomisë së brendshme të vendeve, por edhe tregtisë së vendeve të ndryshme të rajonit me Bashkimin Europian”. /tesheshi.com/
