Drejtori i Policisë së Shtetit, Haki Çako ka deklaruar sot nga Korça se policia është në proces ristrukturimi, ndërsa ka kërkuar nga çdo polic të qëndrojë larg procesit elektoral.
“Strukturat e Policisë së Shtetit janë në proces ristrukturimi. Janë dhënë porositë që të përcillen idetë dhe në bazë për ristrukturimin e policisë në përputhje me objektivat e Ministrisë së Brendshme. Ristrukturim jo vetëm strukturor; por dhe në mentalitet e filozofi. Polici që t’i ofrojë komunitetit shërbim cilësor e në kohë”,- tha Çako gjatë një takimi me strukturat e policisë së qarkut Korçë.
Kreu i policisë u ka kërkuar të gjithë strukturave të policisë së qarkut Korçë por jo vetëm atyre por nëpërmjet tyre edhe një herë të gjithë Policisë së Shtetit që punonjësit e policisë të qëndrojnë në anë të ligjit, larg procesit elektoral.
“Policia e Shtetit nuk ka zgjedhje, nuk është në garë, Policia e Shtetit ka shërbim dhe zbatim me korrektësi të ligjit. Unë dhe stafi im, jemi të vendosur të ndëshkojmë cilindo punonjës policie që do të implikohet në anën politike të cilitdo krah”,- u shpreh Haki Çako.
Ai ka cilësuar si një prioritet të rëndësishëm “Partneritetin kundër terrorizmit”. “Jeni njohur me një plan bashkëveprimi për këtë problem. Kërkoj vëmendje të shtuar nga të gjitha strukturat. Jemi të vendosur të zbatojmë ligjin e të prodhojmë rend e siguri për qytetarët, pa u stepur nga video mesazhet me përmbajtje terroriste”,- deklaroi kreu i policisë.
Ai kërkoi rritjen e tempit ndaj goditjes së krimit, të kultivimit të bimëve narkotike, si dhe reagimin në kohë reale dhe në zbatim korrekt të ligjit ndaj kujtdo që do të tentojë të cenojë procesin elektoral përsa i përket problematikës që mbulon policia.
Drejtori i Policisë Haki Çako ka theksuar se duhet rritur lufta ndaj fenomenit të korrupsionit, së pari brenda radhëve të policisë dhe me tej kudo ku evidentohet ky fenomen.
“Së fundi jam i bindur se tashmë në strukturat e Policisë së Shtetit do vegjetojë profesionalizmi”,- u shpreh z. Çako. /tesheshi.com
