Struktura e Posaçme Antikorrupsion dhe teknologjia në zgjedhje konsiderohen, nga demokratët, si metodat që do të ndalojnë shit-blerjen e votave në zgjedhje.
Oerd Bylykbashi komentoi gjetjet e raportit të ODIHR, por për herë të parë pas zgjedhjeve flet dhe për sistemin zgjedhor dhe listën “Basha”.
Sipas tij, OSBE/ODIHR ka kërkuar për herë të parë marrjen e msave drastike, që kjo të mos ndodhë më.
Bylykbashi tha se depozitimi i kërkesës për komisionin zgjedhor është çështje detyrimi dhe jo besimi.
“Nuk është histori besimi. Nuk ka qenë kurrë histori që të mund të besojmë tek pala tjetër edhe kur ishim në kushte konsensusi, aq më pak sot. Është prioritet. Shqipëria ka shkelur çdo lloj detyrimi dhe ndërkombëtar në këtë fushë. Janë tre palë rekomandime. Sigurisht çështjet që do shtrojmë në tryezë do të kërkojnë debat dhe konsensus në fund fare. Dhe është edhe në nderin e mazhorancës që të ndjekë një standard tashmë të vendosur: konsensusi për të trajtuar problemet e zgjedhjeve. Zgjedhjet fitohen me votë, nuk fitohen as me para, as me kriminelë e as duke bërë ligjin në favorin e atij që do fitojë”, tha Bylybashi për abcnews.
Teknologjia në zgjedhje, votimi me shenjat e gishtave dhe numërimi elektronik, është prioritet i padiskutueshëm i demokratëve. Por shpresën për të zgjidhur në herë e mirë problemin e shit-blerjes së votës e kanë tek ngritja e SPAK, struktura e posaçme antikorruspion me mbështetjen partnerëve amerikanë.
“Zgjedhjet e 2017-ës treguan efektin gjigand narkotik të kanabisit në zgjedhje. Një sasi paraje e jashtëzakonshme e shpërndarë në mënyrë kapilare duke përdorur rrjete kriminale përveç rrjetit të administratës së politizuar tashmë.
Unë shpresoj që në kuadër të implementimit të reformës në drejtësi, korrupsioni zgjedhor, i cili bëhet objekt pune i SPAK, ta vërë prioritet të kësaj strukture të re, me mbështetjen e SHBA-së dhe BE-së, që ta trajtojë korrupsionin politik i cili që ka element kryesor shit-blerjen e votës, në mënyrë që një numër personash të shkojnë para drejtësisë.
Goditjen në rrënjë do t´a japë dhënia e shembujve të ashpër siç bëhet në vende tjera, nëpërmjet goditjes së korrupsionit zgjedhor me burg nga kjo strukturë. Ndaj lind imperativi që Edi Rama të mos kapë sistemin e drejtësisë. Dhe shpresa është e madhe që partnerët ndërkombëtarë, në mënyrë të veçantë Shtetet e Bashkuara, që kanë treguar fokus të veçantë tek SPAK, do të bëjë të pamundur kapjen politike të kësaj strukture dhe do japin gjithë mbështetjen për goditjen e ashpër të këtij fenomeni”, tha Bylykbashi. /tesheshi.com/
