Mazhoranca dhe opozita kosovare janë përplasur jo pak për buxhetin e vitit 2018-të, ku njëra e ka quajtur të zhvillimit kurse tjetra të varfërisë.
Kryeministri Ramush Haradinaj, tha se rritja ekonomike për vitin 2018 do të jetë rreth 5 %, kurse të hyrta parashihen të jenë 1 miliardë e 829 milionë euro.
Ndërkaq, për të sqaruar më në detaje draft-buxhetin, para deputetëve foli ministri i Financave, Bedri Hamza, i cili tha se me këtë buxhet do të ketë, veç tjerash, edhe rritje të pagave.
“Draft buxheti i 2018-ës është i harmonizuar me të gjithë. Përmes këtij buxheti jemi të bindur që kemi bërë një shpërndarje të mirë. Ka një numër të madh të politikave reformuese, implementimi i të cilave zgjat me vite. Draft buxheti nuk duhet të shihet nga këndvështrimi izolues veç për 2018, por më larg. Buxheti është i bazuar nga programi i qeverisë, i reformave të ekonomisë dhe në kontekstin makroekonomik brenda dhe jashtë vendit”, ka thënë ministri Hamza para deputetëve.
Ai deklaroi se Kosova do të ketë rritje ekonomike të qëndrueshme, do të ketë politika tatimore në mbështetje të sektorit privat për krijim të ambientit të përshtatshëm biznesor.
“Do ketë rritje pagash të sektorit publik], financim për skemat sociale, rritje substanciale për financim të projekteve kapitale në sektorin publik. Në vitin 2018 do të kemi rritje ekonomike 4.6% në terma realë, ndërsa nominal 6%. Në këtë rritje ekonomike nuk merren parasysh edhe investimet e mëdha që pritet të ndodhin siç është rasti me ndërtimin e Termocentralit Kosova e Re”, u shpreh Hamza.
Por opozita nuk u pajtua me këto qëndrime, duke thënë se nuk do ta votojë buxhetin pasi nuk siguron mirëqenie të qytetarëve.
Deputeti i Lëvizjes Vetëvendosje, Visar Ymeri ka thënë se VV do të votojë kundër buxhetit për vitin 2018, pasi, sipas tij, ky buxhet nuk ndryshon asgjë me atë të vitit paraprak.
“Nuk duhet të jesh ekspert i financave për të ditur se ky buxhet do të jetë ngjashëm me atë të kaluar. Ajo që vërehet në buxhetin e vitit 2018 është një matematikë e thjeshtë e numrave”, tha ai.
Më tej, ai shtoi se deri më tash qeveritë nuk kanë paraparë rritjen e prodhimit vendor për të rritur edhe të hyrat, duke thënë se në këtë mënyrë do të kishim më shumë para brenda vendit.
“Duhet të ndalet kjo logjikë qeverisëse e cila po dëmton mirëqenien e qytetarëve. Do ta votojmë kundër këtij buxheti”, tha ai.
Kurse shefi i grupit parlamentar të LDK-së, Avdullah Hoti, ka deklaruar se partia e tij e ka analizuar projekbuxhetin dhe se sipas tij është për keqardhje se pas tre vite përmirësime të buxhetit, me program të qartë të kursimeve, buxheti 2018, degradon dhe e kthen situatën para vitit 2015, ku ka pasur një planifikim të dobët buxhetor dhe një planifikim i udhëhequr në mënyrë politike.
Hoti me këtë rast ka përmendur disa arsye që sipas tij, janë analizuar në këtë buxhet e që tregojnë dëmet e tij.
Sipas tij, ky buxhet nuk buron dhe nuk ka ligje për programet qeverisëse 2017-2021.
“Kemi dëgjuar për rritje ekonomike 8%, rritja ekonomike thuhet se do të arrijë 7% në fund të mandatit qeverisës. Në buxhet shihet rritje 4.6, 2018, 4.9 në 2019, kur do të arrihet 8%, ju premtoj se jo me këtë qeveri. Është fazë boshe dhe mashtrim se do të ketë rritje të rritjes ekonomike. Atëherë kritikonin buxhetin 2 miliardë euro, tani bëhet e qartë se u kundërshtua për motive politike. Buxhet me të hyrat më të ulëta që kemi pasur ndër vite në Kosovë. Për vitin 2018, rritja e të hyrave është vetëm 6% . Afër 400 milionë euro ishin të hyrat në qeverinë e kaluar të Mustafës, kurse kjo qeveri do të rrisë të hyrat vetëm në vitin 2020. Ky buxhet dëmton bizneset në ekonomi”, tha Hoti.
Kritika për buxhetin dha edhe deputeti tjetër i LDK-së, Lumir Abdoxhiku i cili tha se nuk do të ketë rritje ekonomike, porse e vetmja gjë që është rritur, është kabineti qeveritar.
“S’do të ketë as rritje të pagave prej 30%, as dyfishim të buxhetit për bujqësi as përmirësim të shëndetësisë dhe arsimit, s’do të ketë as rritje ekonomik prej 8 %. E vetmja gjë që po rritet në këtë kohë është kabineti qeveritar”, tha Abdixhiku, i cili shtoi se LDK nuk do ta japë votën për.
Diskutimet për buxhetin pritet të vazhdojnë edhe pasdite.
Përgatiti: Blendi Gashi –/tesheshi.com/
