Ministri i Jashtëm, Ditmir Bushati, beson se ecuria që ka bërë Shqipëria me zbatimin e reformës në drejtësi krijon kushte të mirë për çeljen e negociatave për anëtarësimin e vendit tonë në Bashkimin Evropian.
Duket se kreu i diplomacisë shqiptare është shumë më tepër optimist për proçesin se sa zyrtarët e Brukselit, të cilët janë shprehur se janë në pritje të zbatimit të Vettingut, që përbën edhe kushtin themelor për çeljen e negociatave.
Bushati mori pjesë në takimin e ministrave të Punëve të Jashtme të Procesit të Bashkëpunimit të Europës Jug-Lindore, ku gjatë një takim me Përfaqësuesen e Lartë të BE-së, Federica Mogherini, shprehu besimin se progresi i Shqipërisë në zbatimin e reformës në drejtësi dhe prioritetet e qarta te qeverisë së re shqiptare në fushën e integrimit, krijojnë kushtet të mira për çeljen e negociatave për anëtarësim.
Në fjalën e tij në konferencë, Bushati nënvizoi tre rreziqet imediate që i kanosen rajonit.
“Rreziku i parë është që zgjerimi mos të konsiderohet më si objektiv parësor i përbashkët. i dyti është që rritja e bashkëpunimit politik në rajon të mos ketë impakt konkret në jetën e qytetarëve tanë dhe rreziku i tretë ka të bëjë me tendencën e re për të sakrifikuar shtetin ligjor në altarin e stabilitetit”, tha Bushati.
Krahas bisedimeve për ritmin dhe cilësinë e procesit të integrimit, kreu i diplomacisë shqiptare u shpreh se “ka ardhur koha që ky proces të ketë një kalendar dhe afate”. /tesheshi.com/
