Shefi i diplomacisë shqiptare, Ditmir Bushati, ka deklaruar hapur se vizita e kancelares Merkel në Tiranë kishte një dimension mjaft të gjerë gjeopolitik, për të ndalur influencën ruse në rajon.
Duke folur në emisionin Top Story, që drejtohet nga gazetari Sokol Balla, Bushati deklaroi se ka një gjatësi të njëjtë vale në mes Berlinit dhe Uashintonit për të mbështetur Ballkanin që të mos lëvizë nga pozicioni strategjik.
Ministri i Jashtëm shqiptar, deklaroi se në fund të vitit në Tiranë do të ketë një tjetër vizitë të rëndësishme, atë të Sekretarit të Shtetit të SHBA, John Kerry. Ndëkaq javën e ardhshme në Shqipëri do të udhëtojë numri dy i Departamentit të Shtetit, Victoria Nuland, e cila do të zhvillojë një tur në rajon.
“Mund të thuhet që Gjermania është donatori kryesor në Ballkanin Perëndimor dhe vizita e Merkel në një pjesë të rajonit bëhet edhe në kontektsin e disa zhvillimeve të rëndësishme me atë se me çfarë po përballet Europa në lindje dhe në jug të saj dhe për shkak të situatës specifike që po kalon Bashkimi Europian dhe Eurozona me krizën greke. Gjermania ka një ripozicionim në këtë kontekst, një kundërpërgjigje dhe një vëmendje ndaj vendeve të Ballkanin Perëndimor. Është po Gjermania që nisi procesin e Berlinit dhe në këtë proces, janë kyçur disa vende dhe disa institucione ndërkombëtare për të lidhur rajonin. Por vizita ishte edhe për të mbajtur vendet e rajonit në perspektivë të qartë europiane, larg influencës së aktorëve të tjerë, që kanë qenë prezencë me investime dhe lidhje të ndryshme në rajon”, tha Bushati në Top Story.
Ministri i jashtëm shqiptar, ka zbardhur një pjesë të negociatave më kancelaren për çështjen e investimeve gjermane.
“Kemi diskutuar me kancelaren Merkel mbi implikimet e krizës greke në Shqipëri dhe rajon dhe ka qenë një interesim i drejtpërdrejtë i saj për të mësuar qëndrimin tonë mbi këtë çështje. Kemi avancuar me kërkesat tona ndaj Gjermanisë dhe institucioneve të BE-së sesi problemet e krizës greke mund të rregulloheshin në ekonominë tonë dhe sigurisë që shpërfaq kriza greke, sigurisë energjitike, aq më tepër që një pjesë e investimeve strategjike vihen në pikëpyetje, i vetmi projekt që ka nisur të zbatohet, është TAP, të tjerët janë të gjithë virtualë. Tashmë kemi rrjedhën turke, që Greqia kërkon ta quajë rrjedha turko-greke, por të gjitha planet për sistemin energjitik janë vënë në pikëpyetje dhe kjo sjell pasoja edhe për BE-në. Greqia ëshë një vend që ka çështje dypalëshe të pazgjidhura me një pjesë të mirë të fqinjëve të saj dhe ne e dimë që në situata të vështira, nacionalizmi kthehet në modë. i gjithë ky kontekst ka qenë pjesë e diskutimeve të djeshme me kancelaren Merkel”, deklaroi Bushati.
Në lidhje me projektet konkrete, ai deklaroi se “Kemi folur me kancelaren gjermane për prioritetin tonë për korridorin adriatiko-jonian, ku një pjesë e mirë është e ndërtuar dhe është një projekt i realizueshëm në një afat kohor jo shumë të largët. Jo vetëm për rrugët, por edhe për ndërlidhje me aeroporte e porte, por edhe për degëzimin e TAP-it me IAP. Është folur për arsimin, fushën e arsimit profesional e kështu me radhë”, tha Bushati, duke shtuar se për korridorin adriatiko-jonian është bërë studimi i fizibilitetit”.
Ndërkaq, duke folur për marrëdhëniet me Shtetet e Bashkuara të Amerikës, Bushati ka shuar çdo aludim për një tërheqje të palëve.
“Nuk kemi zhvendosje as në politkën e jashtme, as në terminologji. Niveli i marrëdhënieve me SHBA është më i larti i mundshëm. Kujtoj këtu vizitën time në SHBA, firmosjen e partneritetit strategjik mes SHBA dhe Shqipërisë. Fushat e bashkëpunimit dhe plani i veprimit të këtij partneriteti janë të ndërthurura në këto biseda që po zhvillojmë këtu. Shqipëria është një ndër vendet që ka kontribuar krah për krah me SHBA sa i përket sigurisë dhe bashkëpunimi brenda NATO-s ka qenë i shkëlqyer. Javën e ardhshme do të kemi vizitën e Viktoria Nuland në Tiranë, si pjesë e turit të saj rajonal, para pak javësh kishim Hoyt Yee dhe dialogu mes SHBA dhe Shqipërisë mbetet intensiv. Shpresojmë që deri në fund të viti të kemi vizitën e Kerry në Tiranë, si pjesë e vizitës së tij në rajon. E shohim bashkëpunimin tonë me SHBA dhe Gjermaninë komplementar. Do të ishte aventurë për këdo që mund të mendojë se ne mund të bëjmë lojra të mëdha mes dy superfuqive të mëdha botërore”, u përgjigj Bushati./tesheshi.com/
