Tire Alldervishi, sanitarja e COVID 2, spitalit “Shefqet Ndroqi”, e zbuluar publikisht si mashtruese në zhvatjen e një të bijës së një pacienteje, duke i marrë asaj deri në 8 milion lekë në disa ditë, doli para gjykatës për masën e sigurisë.
E vetmja fjalë e saj ka qenë: “Aktualisht nuk jam mirë psikologjikisht dhe sqarime do jap në faza të tjera të hetimit…”.
Por gjykata vendosi që ajo të qëndrojë në burg. Kjo e fundit kërkoi nga prokuroria që të thellohet në hetime, me dyshimet se mos sanitarja nuk ka vepruar e vetme, pra se mos është pjesë e një rrjeti abuzues bluzash të bardha në këtë spital.
Denoncuesja e rastit është shtetasja Eltjana Sinanaj, e ëma e së cilës ishte shtruar te “Shefqet Ndroqi” pas rëndimit të gjendjes shëndetësore, e infektuar me COVID. Dhe Tire Alldervishi, e hequr si infermiere, ka nisur t’i kërkojë para për shërbimet që duhet t’ja kryente të ëmës.
Kjo e fundit ka ndërruar jetë, por pas ka mbetur një aferë që ka tronditur publikun shqiptar këto ditë. Gjithsesi, deri më tani besohet se rasti është i izoluar dhe se sanitarja ka vepruar e vetme.
Vetë stafi i “Shefqet Ndroqit” ka kërkuar hetim të thellë e ndëshkim të rastit. /tesheshi.com/
