Zëvendëskryeministri i Çështjeve Evropiane, Bujar Osmani, në takimin e sotëm në Berlin me ambasadorët e vendeve të Ballkanit Perëndimor, bëri të ditur se qeveria e Maqedonisë në periudhën e ardhshme do të fokusohet në çështjen e emrit me qëllim që të përshpejtohen euro integrimet.
Ai theksoi se edhe vizita e tij sot në Berlin dhe gjatë këtij muaji në Athinë, si dhe vizita e paralajmëruar e shefit të diplomacisë greke Kocias në Maqedoni, janë pikërisht për këtë çështje.
Kontesti me emrin, sipas Osmanit, mbetet prioritet i qeverisë, nga momenti kur u zgjidh çështja me gjuhët dhe nënshkrimi i marrëveshjes me Bullgarinë.
“Kjo çështje tanimë po bëhet prioritet i Qeverisë. Ne përfunduam dy çështje madhore. Tani kemi energji të përqendrohemi te emri.
Presim që në këtë rrugë të kemi më shumë miq dhe për këtë është i gjithë aktiviteti i kësaj Qeverie në komunikim me të gjithë shtetet, por edhe me fqinjin tonë jugor dhe me të tjerë. Ta shfrytëzojmë këtë klimë pozitive që është në vend, në rajon, në Bruksel, në vendet anëtare të BE-së, t’i mbyllim çështjet dhe të bëjmë hapa esenciale në drejtim të euro-integrimit”, deklaroi Bujar Osmani. /tesheshi.com/
