Samiti i zgjeruar i liderëve të Bashkimit Europian, planifikuar për ditën e diel është anuluar, thanë burime zyrtare të Komisionit Europian, të cilat sqaruan më pas se disa nga liderët e eurozonës pritet të takohen sot, rreth orës 15.00. Ndërsa samiti i zgjeruar i 28 vendeve është anuluar e kjo do të thotë se liderët do të mbeten në diskutime me njëri-tjetrin derisa të përfundojnë negociatat me Greqinë.
Disa liderë të eurozonës kanë mbetur skeptikë për propozimet greke, duke shtuar druajtjen se Greqia mund të dalë nga eurozona. Por, ka të tjerë si kryeministri Italian Matteo Renzi, që këmbëngulin se nuk duhet lejuar që Greqia të falimentojë. “Logjika duhet të sundojë dhe një marrëveshje duhet të arrihet. Italia nuk dëshiron që Greqia të largohet nga zona euro dhe i them Gjermanisë: Mjaft është mjaft”, citohet të ketë thënë Renzi nga gazeta e Romës, “Il Messaggero”.
Ndërsa në Bruksel nuk kanë munguar edhe skenarët e një komploti gjerman. Dimitrios Papadimoulis, zëvendës-president I Parlamentit Europian dhe anëtar i Syriza-s shprehu pakënaqësinë e vet ndaj Gjermanisë duke thënë: “Ajo që luhet këtu është një përpjekje nga Gjermania për të poshtëruar Greqinë dhe grekët, ose për të rrëzuar qeverinë e Cipras”. /tesheshi/
