Majlinda Bregu, ish-deputete e PD-së, ka reaguar ndaj qëndrimit më të fundit të partisë më të madhe të opozitës, e cila mbështet kërkesat e institucioneve të vetingut, madje duke paraqitur edhe një draft në funksion të tyre.
Por Bregu duke kujtuar deklarimet e Lulzim Bashës, që sipas saj, e cilësonte proçesin si një projekt mafioz të ndërkombëtarëve, tha se nesër në sallën e Kuvendit, ai duhet të sqarojë këtë ndryshim qëndrimesh.
Sipas Bregut, vetingu duhet, por askush nuk e do. Bregu vijon “nesër, Lulzim Basha ka rastin të tregojë se e do vetingun, ashtu siç pretendon ai”.
Nga ana tjetër, ish ministrja e integrimit e shpreh hapur mendimin e saj, duke thënë se çështja e sasisë së pagës për shqiptarët që do të nisin vetingun, është thjesht një lojë e hedhur në ajër për të mbytur në njëfarë mënyrë reformën e nevojshme në drejtësi.
Analiza e Bregut
Debati i ditëve të fundit për organikën e Institucioneve të Pavarura të Vettingut është as më pak e as më shumë, por vazhdimi i lojës të shëmtuar politike me proçesin kyç të Reformës në Drejtësi.
Që të mos keqkuptohem po e them qartë që në krye: Vettingu duhet, por asnjë nuk e do!
Menyra se si iu qasëm këto dy vitet e fundit Reformës në Drejtësi, -kakofonia dhe mungesa e koherencës në betejën politike të PD-së me të; largimi nga Komisioni i Reformës në Drejtësi pikërisht kur diskutohej ligji i Vetting-ut; bllokimi i votimit të Vettingut për muaj me radhe si pasojë e bojkotit të opozitës; shpallja e tij nga Lulzim Basha si “projekt mafioz i ndërkombëtareve”; tallja e vazhdueshme e kryeministrit dhe përfitimi nga pantonima politike e opozitës për ta shpallur veten, heronj të Reformës në Drejtësi, shto këtu dhe përzgjedhjen e kandidatëve që do të kryejnë Vettingun, -janë dëshmia më e mirë e lehtesisë së papërballueshme me të cilën është shoqëruar ky proçes.
I njëjti ajër loje ndjehet edhe sot.
Unë do të isha shumë dakord që komisionerët e Vettingut të kenë staf dhe pagë më të lartë se niveli i pagave në Shqiperi.Thënë ndryshe, dakord me çdo propozim edhe pse jo racional për realitetin shqiptar, por me kusht që ky të vendoste një standart logjik të pakundërshtueshëm e mbi të gjitha të paekzagjeruar për çdo institucion të ri që ngrihet nga ky ligj.
Sigurisht që nëse nuk do të ishte mallkuar kaq shumë Vettingu, edhe kandidatët do të kishin qenë më të mirë.
Por nuk më rrihet pa thënë që nëse debate për rëndësinë e Vetting-ut katandiset nesër me vote pro e votë kundër për nivelin e pagave e organikën e stafit, dhe kjo përkthehet si mbështetje politike dhe/ ose bllokim politik i Vettingut, ne thjesht kemi patur frike ta mendojme seriozisht këtë punë.
Nëse është “projekt mafioz i ndërkombëtarëve për t’ja lënë Drejtësinë Edi Ramës”-nesër Lulzim Basha duhet të argumentoje me fakte, këtë tezë.
Mbase në Qershor kur u votua ligji nuk e bënte dot, se nuk e linte marrëveshja e Maj-it. Por nesër i duhet ta bëje. Ka mundësinë të mbrojtjes së ligjshme të ndjesisë së tij të pamëshirshme për drejtësi të pakapur!
Kjo do të ishte betejë dhe jo të votosh kundër se nuk të zë vendi, meqë komisionerët e vettingut s’ do marrin 10000 euro pagë në muaj!
Mund ta bëjë nesër, si njeri qe vetëm parimet e udhëheqin në jetë, pa llogari buxheti dhe me ashpërsi juristi. /tesheshi.com/
