Më i spikaturi i tetë takimeve të së martës në Champions League, ai mes Borusias së Dortmundit dhe Realit të Madridit, ka përfunduar 2-2.
Madrilenët kanë kaluar dy herë në epërsi, së pari me Ronaldo-n, e më pas me golin e shënuar nga Varane. Në të dy herët janë kundërpërgjigjur vendasit e Borusias, duke barazuar me Aubameyang e Schurrle.
Dy kanë qenë fitoret më të thella të mbrëmjes. Kopenhageni ka fituar 4-0 ndaj Bryzhit. Me të njëjtin rezultat ka fituar Juventusi në Zagreb ndaj Dinamos. Pjanic, Higuain, Dybala dhe Dani Alves kanë qenë shënuesit për torinezët.
Mbrëmje pozitive ka rezultuar dhe për dy ekipet angleze. Totenhemi ia ka dalë të fitojë ndaj CSKA-së së Moskës në shtëpinë e saj. Heung-Min Son ka qenë shënuesi i vetëm për Totenhemin në fitoren 0-1.
Ndërkohë, ndryshe paraqitjeve në kampionatin anglez, Lestër Siti ka gjashtë pikë të plota pas dy ndeshjesh në Champions League. Lestëri ka mposhtur 1-0 Porton. Goli është shënuar nga Slimani në minutën e 25-të.
Sportingu i Lisbonës ka fituar 2-0 ndaj Legias së Varshavës, e 1-0 ka përfunduar takimi midis Seviljes dhe Olimpikut të Lionit.
Barazimi i dytë në tetë ndeshjet ishte ai mes Monakos dhe Bajerit të Leverkusenit. Fatlumë kanë qenë vendasit në barazimin 1-1. Goli i tyre ka ardhur në minutën e 94-t, pasi për gjermanët kishte shënuar Hernandez në minutën e 74-t.
Tetë ndeshjet e së martës ndiqen nga tetë të tjera në Champions League mbrëmjen e ditës së sotme. /tesheshi.com/
