Në Bundesligë ka nisur të premten java e pestë, e hapur me takimin Borusia e Dortmundit – Frajburg.
Te Frajburgu aktivizohet Amir Abrashi, mesfushori i përfaqësueses së Shqipërisë, i transferuar një vit më parë në Gjermani. Ai ka luajtur përgjatë 90 minutave në takimin e mbrëmshëm.
Borusia ka dominuar në lojë e në rezultat, duke fituar 3-1.
Pas golave të Aubameyang-ut në minutën e 45-të dhe të Piszczek-ut në të 53-tën, miqve u ka dhënë paksa jetë goli i Philipp-it pak më pas.
Frajburgu ka shpresuar se mund ta barazojë rezultatin, por kjo nuk ka ndodhur. Guerreiro u ka dhënë fund këtyre shpresave me golin e tij të minutës së 91-të.
Borusia e Dortmundit ka arritur fitoren e katërt në pesë javë, dhe ndan përkohësisht vendin e parë me Bajernin e Mynihut.
Në Francë, ka befasuar Tuluzë, që ka fituar 2-0 ndaj PSG-së. Një fitore që e ngjit atë në vend të dytë në renditje.
Për PSG-në, skuadrën kampione të sezonit të shkuar, kjo ishte humbja e dytë në shtatë javë.
Ekipi që e ka dominuar futbollin francez për vite nuk po mundet të dalë nga një tranzicion i provokuar prej ndërrimit të trajnerëve dhe largimit të disa prej lojtarëve më të dalluar, ku veçohet ai i Ibrahimovic-it. /tesheshi.com/
