Kombet e Bashkuara thonë se gati dy milionë njerëz kanë mbetur pa ujë në Halep si rezultat i sulmeve të njëpasnjëshme.
UNICEF-i ka lajmëruar se sulmet e vazhdueshme kanë dëmtuar stacionin që furnizonte me ujë pjesën lindore të Halepit, ku gjenden më tepër se 250.000 banorë.
Përfaqësuesja e kësaj agjencie të OKB-së në Siri, Hanaa Singer, bën me dije se, në kundërpërgjigje, është kyçur stacioni që furnizon pjesën perëndimore të qytetit, ku jetojnë 1.5 milionë njerëz e që është nën kontrollin e forcave qeveritare.
Zëvendësdrejtori i UNICEF-it, Justin Forsyth, i ka deklaruar BBC-së, “Halepi po vdes dalëngadalë dhe bota po vështron; uji po bombardohet dhe po pritet. Ky është akti më i fundit i çnjerëzorësisë.”
Zëdhënësi i këtij organizmi ka paralajmëruar se mungesa e ujit mund të jetë katastrofike, pasi banorët do duhet të përdorin ujë të pistë, duke u hapur rrugën sëmundjeve.
Sulmet e së premtes e kanë bërë të pamundur riparimin e stacionit të pompimit që furnizon atë pjesë të Halepit nën kontrollin e kryengritësve. /tesheshi.com/
